Qara Qarayev: Fortuna bizdən üz çevirməsəydi, Osloda qol vura bilərdik

Azərbaycan yığmasının yarımmüdafiəçisi Qara Qarayevin azerisport.az saytına müsahibəsi

- Norveçlə səfər heç-heçəsi barədə nə deyə bilərsiniz?
- Bu oyuna yaxşı hazırlaşmışdıq. Baş məşqçimizin bizə olan inamı nəticəsinə heç-heçəyə nail ola bildik. Çox ağır oyun oldu. Bəzi epizodlarda bəxtimiz də gətirdi. Amma fortuna bəzən bizdən də üz döndərirdi. Əks halda yığmamız qol vura bilərdi.

- Belə uğurlu çıxışınızın əsas sirri nədədir?
- Biz qorxmurduq, sakit oynayırdıq. Robert Prosineçki də bizdən bunu tələb edir. Bunun heç-heçədə payı az olmadı.

- Sanki Norveçin bizim yığmadan elə oyun gözləmədiyi hiss olunurdu...
- Norveçlilərin hava toplarında uğurlu çıxış etdiyini bilirdik. Amma hər şeyə hazır idik.

- Rəqib futbolçu topu qapı çatına vuranda, hesabın açılacağını düşünmədiniz?
- Hə, bir qədər qorxdum. Amma səfərdə belə yaxşı oyun sərgilədikdən sonra son dəqiqə qolu ilə xalsız qalmaq çox üzücü olardı.

- Sizə elə gəlmir ki, yığmamıza bu oyunda yaxşı hücumçu lazım idi?
- Ruslan Qurbanovun əziyyətini yerə vurmaq istəməzdim. O, yaxşı oynadı. Sadəcə, son nöqtəni qoya bilmirdi.

- Martin Edeqora qarşı oynamaq çətin idi?
- Ona qarşı oynamaq mənim üçün xoş idi. Ola bilər ki, o, gələcəyin ən yaxşı futbolçusu olacaq. "Real" kimi komandanın futbolçularına qarşı mübarizə aparmaq hamı üçün çətin olur.

- Komandadan uğurlu çıxışın davamını gözləyə bilərik?
- Mənə elə gəlir ki, biz evdəki oyunlarda rəqiblərimizdən xal ala biləcəyik. Artıq sentyabrdakı oyunu düşünməliyik.