Eddi İsrafilov: Elə bir komandaya keçmək istəyirəm ki, orada oynaya bilim

Azərbaycan yığmasının yarımmüdafiəçisi Eddi İsrafilov gələcək karyerası ilə bağlı İspaniya mətbuatına müsahibə verib. Azerisport.az xəbər verir ki, müqavilə ilə "Mursiya"ya məxsus olsa da, son mövsümü icarə əsasında "Qranada"da keçirən futbolçu öncə bunları söyləyib:

"Karyeramı harada davam etdirəcəyimi hələ bilmirəm. Bütün işlərimlə menecerim məşğul olur. Hazırda məni daha çox fiziki formam narahat edir. Çünki zədəmi yeni sağaltmışam və bu üzdən fiziki kondisiyalarımı yaxşılaşdırmağıma ehtiyac var. Yeni klubuma gəlincə, elə bir komandaya keçmək istəyirəm ki, orada oynaya bilim və gələcək üçün hər şey yaxşı olsun".

Gənc xavbekin keçməsi ehtimal olunan komandaladan biri "Almeriya"dır. Hansı ki, futbolçumuz özü elə həmin komanda ilə eyni adı daşıyan bölgədə anadan olub, böyüyüb. Üstəlik, Eddi özü də bu komandaya simpatiyasının olduğunu gizlətmir: "Elədir. İmkan olan kimi bu komandanın oyunlarına gedirəm. Amma "Almeriya"ya keçəcəyimə dair dəqiq bir söz deyə bilmərəm. Bilirəm ki, yaxşı komandadır, yaxşı baş məşqçisi var. Vaxtilə Sequnda Liqada onlara qarşı oynamışam".

Eddi İspaniyanın üçüncü liqasında çıxış edən "Mursiya"ya qayıtmaq fikrində olmadığını bəyan edib: "Sequnda B-də çıxış etməkdə nə mən, nə də klub maraqlıdır".

23 yaşlı futbolçu son mövsümün böyük hissəsini zədə səbəbindən buraxmasından da danışıb: "Mövsümün böyük hissəsini zədəmi sağaltmaqla keçirdim. Ağır zədə oldu. Dörd ay oynamadım. Artıq tam bərpa olmuşam. Son bir ayda "Qranada" ilə məşq etmişəm".