Elxan Məmmədov: Millinin hələ qrup üçüncüsü olmaq şansı qalır

AFFA-nın baş katibi Elxan Məmmədov AÇ-2016-nın seçmə mərhələsi çərçivəsində Norveçə qarşı keçirilmiş oyundan danışıb. Azerisport.az saytına açıqlamasında o, qolsuz bitən qarşılaşma ilə bağlı öncə bunları söyləyib:

"Əsas odur ki, vətənə əliboş qayıtmırıq. Səfərdən bir xalla qayıdırıq. Bu xal bizim üçün çox vacibdir. Çünki səfərdə oynayırdıq. Özü də Norveç yığması qrupdan çıxmaq uğrunda mübarizə aparır. Robert Prosineçkinin də dediyi kimi, bu qələbəni Bakıda təşkil olunan Avropa Oyunlarına həsr edirik".

Məmmədovun sözlərinə görə, komandamız ilk 45 dəqiqədə daha yaxşı oynayıb: "Hər iki  hissədə yaxşı təsir bağışladıq. Amma ilk yarının daha uğurlu alındığını düşünürəm. Komandamız bu oyunda öz dişini göstərməyi bacardı. Əsas odur ki, qol buraxmadıq, səfərdə bir xal qazandıq. Bu, bizim üçün kiçik uğur deyil. Baxmayaraq ki, qələbəyə də ümidli idik".

AFFA-nın baş katibi komandamızın qrup üçüncüsü olmaq şanslarından da söz açıb: "Nəzəri cəhətdən hələ şansımız qalır. Yeni baş məşqçi ilə ikinci rəsmi oyunumuzda da uduzmamağımız məni daha çox sevindirir".

"Robert Prosineçki tsiklin əvvəlindən yığmamıza rəhbərlik etsəydi, nəticələrimiz fərqli olardımı" sualına Məmmədovun cavabı belə oldu:

"Hər şey ola bilərdi (gülür). Amma o, öz işinə bu ildən başlayıb".