Mirhüseyn Seyidov: İnterə keçməyə söz vermişdim, bu sözümü də tutdum
"İnter"in yeni transferi Mirhüseyn Seyidov paytaxt klubuna keçidindən danışıb. Azerisport.az saytına açıqlamasında o, öncə bunları söyləyib:
"Artıq yarım illik müqavilə bağlamışıq. Seçimimdə maliyyə amilinin heç bir əlaqəsi yoxdur. Digər variantlar da var idi. Hətta "İnter" digər klublardan az pul təklif edirdi. Amma bu komandanın Avropa Liqasına vəsiqə qazanması seçimimə təsir etdi. Hər şey yaxşı olsa, müqavilənin müddətini mövsümün sonunadək də artırmaq olar. Bunların hamısını müzakirə etmişik. Düzdür, indi komandanın çətinlikləri var. Bir yerli futbolçu kimi komandaya bu çətin vəziyyətində kömək etmək istədim. Bura futbol oynamağa gəlmişəm. Pul mənim üçün üçüncü plandadır. Hətta "Neftçi"də olanda da heç kimlə pul söhbəti etmirdim. Nə qədər pul aldığımı ilk maaşımda bilmişdim".
Seyidov komandanın yeni baş məşqçisi Zaur Svanadze ilə görüşdüyünü də bildirib: "Görüşümüz olub. Məni yaxşı qarşıladı. Bildirdi ki, sən bizim komandada görmək istədiyimiz futbolçulardandır. Oyunumu xoşladığını söylədi. Komandadakı problemlərdən o da danışdı. Artıq toplanışa gecikirik. Qarşıda Avropa Liqasının püşkatması var. Onu gözləyirik".
23 yaşlı futbolçu AZAL və "Zirə"yə keçəcəyi barədə xəbərlərə də münasibət bildirib: "AZAL-ın baş məşqçisi Tərlan Əhmədovla görüşdüm, söhbət etdim. O, bildirdi ki, səni komandada görmək istəyirəm. "Zirə" ilə də danışdım. Amma klubsuz olduğum dövrdə ilk təklifi mənə "İnter" etmişdi. Bir həftə düşünəndən sonra danışıqlara başladıq. Orada söz verdiyim insanlar vardı. Bir daha qeyd edirəm ki, "İnter"ə Avropa Liqasında oynamaq üçün gəlmişəm. "İnter"ə keçəcəyimə söz vermişdim, ona görə də sözümü tutdum".
