Qəbələnin yeni baş məşqçisi müəyyənləşdi
“Qəbələ”nin əvəzedici komandasının yeni baş məşqçisi müəyyənləşib. Azerisport.az xəbər verir ki, bu vəzifəyə Ramin Quliyev təyin edilib.
2014/15 mövsümündə klubun U-17 komandasını çalışdıran 34 yaşlı mütəxəssis həm U-17 Liqası, həm kubokunun qalibi olub, “Qızıl dubl”a imza atıb. Quliyev əvəzedici komandanın “sükanı arxası”nda 3 il çalışan ispaniyalı Luis Araqonu əvəzləyib.
U-17-yə qədər “Qəbələ”nin U-12 komandasında da baş məşqçi olan Quliyevin yetirmələri 2013/14 mövsümünü gümüş mükafatla başa vurublar. O, 2014-cü ilin sonunda əsas komandada baş məşqçi vəzifəsini icra edən Sənan Qurbanovun köməkçisi kimi də fəaliyyət göstərib.
Quliyev futbolçu karyerasını da “qırmızı-qara” formada başa vurub. “Şəfa” (1997-1998, 2001-2002), “Bakı” (2000-2001, 2004-07), “Neftçi” (1997-1998, 2003-2004, 2007-08), “Olimpik” (2008-2009), “Standard” (2009-2010) klublarında çıxış edən sabiq müdafiəçi 2010-2011-ci illərdə “Qəbələ”nin şərəfini qoruyub. Bu müddətdə o, komandamızın heyətində 5 oyun keçirib. 2005-2008-ci illərdə Azərbaycan millisinin formasını geyinən müdafiəçi 18 matçda iştirak edib.
Hazırda Ərzurumda - əsas komandanın düşərgəsində olan Ramin Quliyev təyinatı ilə bağlı fikirlərini klub saytına açıqlayıb:
"Artıq üçüncü ildir ki, "Qəbələ"də çalışıram. Daha öncə akademiyanın U-12 və U-17 komandalarına rəhbərlik etmişəm. Artıq əvəzedici komandaya təyinatım rəsmiləşib. Bu isə daha böyük məsuliyyət deməkdir. Əsas komanda ilə birbaşa əlaqəli işləməli, akademiya və əsas komanda arasında möhkəm körpü rolunu oynamalıyıq. Hazırda əsas komandanın düşərgəsindəyəm. Bura gəlməkdə məqsəd əsas komandanın iş prinsipi, məşq proqramı və digər vacib məqamlarlarla əyani tanış olmaqdır. Məşqləri izləyir, lazımi qeydləri aparır və baş məşqçi Roman Qriqorçukdan məsləhətlər alıram. Məqsədimiz futbolçuların əvəzedici komandadan əsas komandaya keçərkən oyun planında çətinlik çəkməməsi, kollektivə tez uyğunlaşmasıdır. İnanıram ki, bu məsuliyyətin öhdəsindən layiqincə gələcəyəm və mənə olan inamı doğruldacağam".
