Kamal Quliyev: Baş katib söz verdi ki, Neftçalanın lisenziya problemi ilə şəxsən məşğul olacaq

"Neftçala"nın baş məşqçisi Kamal Quliyev komandanın qarşıdakı planlarından danışıb. Azerisport.az saytına açıqlamasında o, bunları söyləyib:

"Allah eləsin ki, fəaliyyətimizi davam etdirək. AFFA-nın baş katibi Elxan Məmmədovla görüşdüm. Ona dedim ki, klubumuz Azərbaycan futboluna çoxlu istedad bəxş edə bilər. İki-üç il sonra onlar ölkənin aparıcı klublarında oynaya bilərlər. Məmmədov məni çox yaxşı qəbul etdi. Xahiş etdi ki, işimizi davam etdirək. O, bizim növbəti mövsüm üçün lisenziya problemimizin həllinə şəxsən yardımçı olacağını bildirdi".

Quliyevin sözlərinə görə, "Neftçala" növbəti mövsümdə də qarşısında çempionluq hədəfi qoyacaq: "Biz yenidən çempion olmaq istəyirik. Düzdür, çempion olsaq da, Topaz Premyer Liqasına vəsiqə qazana bilmədik. Amma göstərmək istəyirik ki, hər şeyə rəğmən yolumuza davam edirik. Ona görə burada qalmağa qərar verdim. Yenidən birinci olmaq istəyirəm. Getsəydim, düzgün olmazdı. Futbolçuların ümidi mənədir, onları belə qoyub getmək istəməzdim. Onlar hələ Azərbaycan futboluna fayda verəcəklər".