Elxan Məmmədov: İstərdim ki, tək Nazarov yox, digər futbolçularımız da qol vursun

AFFA-nın baş katibi Elxan Məmmədovun azerisport.az saytına müsahibəsi

- AÇ-2016-nın seçmə mərhələsi çərçivəsində Norveçlə oyundan nə gözləyirsiniz?
- Əlbəttə. Malta ilə son seçmə mərhələ oyununda futbolçularımız inamlı futbol sərgilədilər və vacib 3 xal qazandılar. Komanda Norveçlə oyuna da hazırdır. Ümid edirəm ki, növbəti üç xalımızı qazana biləcəyik.

- Standart vəziyyətlər Norveç yığmasının ən güclü tərəflərindən sayılır, bizdə isə əsas problemlərdən...
- Serbiya ilə oyunun nəticəsi heç kimi yanıltmasın. Yoxlama oyunları vacibdir, amma nəticə elə də önəm kəsb etmir. Baş məşqçi oyunçuları yoxlamağa çalışdı. Bununla o, rəsmi oyunda düzgün start heyətini müəyyənləşdirmək məqsədi güdürdü. Serbiyaya məğlubiyyətə baxmayaraq, rəsmi oyunda həm sərgilədiyimiz futbol, həm də nəticə fərqli olur.

- Qələbə qazanmaq üçün qol vurmaq lazımdır. Kimdən qol gözləyirsiniz?
- Son oyunları yada salsaq, ağıla ilk gələn Dmitri Nazarovdur. Malta ilə oyunda o, rəqib qapısına gözəl qol vurdu. Amma digər futbolçularımızın da qol vurmasını istərdim.

- Norveç yığmasına çox güclü dəstək olacaq. Bəs bizim millini nə qədər azarkeş dəstəkləyəcək?
- 300 nəfər. Onların hamısı qonşu ölkələrdən gələnlərdir. Azərbaycanın Norveçdəki səfirliyi, eləcə də Mədəniyyət evi ilə əlaqə saxlamışıq, 300 bilet paylamışıq. Biletlərin hamısı AFFA-nın hesabına alınıb.

- Yığmamızın Norveçlə oyunda hansı üstünlüyü var?
- Rəqibin üstünlüyü sürətli futbol oynamağıdır. Bizim komandamız isə öz texnikasına görə rəqibi üstələyir. Bizim Bakıya yaxşı nəticə ilə qayıtmaq şansımız var.