Per-Matias Heqmo: Azərbaycan ilə oyun üçün yaxşı planımız var

Norveç yığmasının baş məşqçisi Per-Matias Heqmo AÇ-2016-nın seçmə mərhələsi çərçivəsində Azərbaycana qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, bu gün baş tutan mətbuat konfransında bunları söyləyib:

"Stefan Yohansen və Martin Edeqor İsveçlə qarşılaşmada yaxşı oyun sərgilədilər. İstərdim ki, isveçlilərlə görüşlə müqayisədə sabahkı oyunda çoxlu qol görüm. Komandamızda qol vurmağa qadir çox oyunçu var. Təkcə Edeqordan yox, hücumçularımızdan da qollar gözləyirəm".

Heqmo Azərbaycan yığmasından da danışıb: "Müdafiədə çox diqqətli olmalıyıq. Azərbaycan yığması hücumda yaxşı oynamağa qadirdir. Daha çox təkbətək mübarizələrə üstünlük verəcəyik. Uduzmamalıyıq. Çünki qələbəyə köklənmişik".

Norveçlilərin çalışdırıcısı millimizin Serbiya ilə yoxlama oyununa da (1:4) toxunub: "Serblərlə oyunda gördüm ki, Robert Prosineçki Azərbaycan yığmasında komanda oyununu aşılayır. Onların futbolçuları yaxşı top saxlayırlar və hücumda çox təhlükəlidirlər".

"Azərbaycan yığması bizimlə Bakıdakı oyunla müqayisədə indi daha yaxşı təsir bağışlayır. Komandada baş məşqçi dəyişikliyi də olub. Üstəlik, stadionun qazonu da keyfiyyətli deyildi. Cavab oyununda nə baş verəcəyini proqnozlaşdırmaq çətindir. Amma heyətimizdə yaxşı formada olan 23 futbolçu var. Ümid edirəm ki, bu, qələbə üçün yetərli olacaq".

Heqmo heyəti demək olar ki, müəyyənləşdirdiyini bildirib: "Amma hələ adları açıqlamaq istəmirəm. Bu matç üçün yaxşı planımız var. Hətta B və C planlarımız da var".