Per-Silyan Şelbred: Azərbaycan Norveç üçün problem yarada bilər

Norveç yığmasının kapitanı Per-Silyan Şelbred AÇ-2016-nın seçmə mərhələsi çərçivəsində Azərbaycana qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, bunları söyləyib:

"Azərbaycan yığmasının bir neçə matçının videoyazısını görmüşük. Çox texnikalı komandadır. Topu özlərinə saxlamağa çox fikir verirlər. Hesab xeyirlərinə olanda, onlar irəli təsadüfi hallarda çıxırlar. Əvəzində demək olar ki, hər bir hücumları təhlükəli alınır. Amma biz istənilən halda bu komanda üzərində qələbə qazana bilərik".

"Azərbaycan bizim üçün problem ola bilərmi? Demək çətindir. Əgər onlar indiyə qədərki uğurlu oyunlarındakı kimi futbol sərgiləsələr, bizim üçün pis gün ola bilər. Ən azından onların Bakıdakı kimi bizə az çətinlik yaratmayacağına əminəm".

Şelbredin fikrincə, qələbə hər iki komandaya lazımdır: "Turnir cədvəlinə baxsaq, hər iki komandanın qələbəyə ehtiyac duyduğunu görürük. Ona görə Azərbaycan yığmasının da Osloda aqressiv çıxış edəcəyinə əminəm. Lakin cümə günü qələbə qazanacağımıza ümid edirəm. Başqa bir nəticə məni çox narahat edər".