Səməd Qurbanov: Neftçi tənqidlərə hazırdır, əsas odur ki, sonra nəticə olsun
"Neftçi"nin Müşahidə Şurasının üzvü Səməd Qurbanovun azerisport.az saytına müsahibəsi
- Komandanı Samir Əliyevə tapşırmağınıza nə səbəb oldu?
- O, perspektivli məşqçidir. Öz kadrlarımıza özlərini göstərmələri üçün şans vermək lazımdır. Amma etiraf edirəm ki, Əliyevin bu posta gətirilməsi müvəqqəti təyinatdır. Biz onun fəaliyyəti dövründə yeni baş məşqçi axtarışımızı davam etdiririk.
- Bəs Əliyevin rəhbərliyi altında komanda parlaq oyun sərgiləsə, yaxşı nəticələr qazansa, necə olacaq?
- Hələ onun kifayət qədər təcrübəsi yoxdur. Amma hər şey yaxşı getsə, niyə də onu postunda saxlamayaq? Samir gəncdir və hər şey özündən asılıdır. Lakin biz hazırda ona sadəcə, müvəqqəti əvəzləyici kimi baxırıq.
- "Neftçi"nin Valeri Qazzayev və Yuri Syominlə maraqlandığı bildirilirdi...
- Biz bu adlarla maraqlanmamışıq.
- Komandanı artıq beş legioner tərk edib. Yenə gedənlərin olacağı istisna deyil. Avropa Liqasına bir aydan da az vaxt qalıb. Bu, Samir Əliyevə problem yaratmayacaq?
- Bu yöndə işlərimiz tam sürətlə davam edir. Yeni legionerlər dəvət edəcəyik. Amma onların sayı əvvəlki kimi çox olmayacaq. Bundan sonra yalnız güclü legionerlərə üstünlük verəcəyik.
- Əsasən, yerli futbolçulara üstünlük veriləcək?
- Bəli, biz əsasən gənclərə üstünlük verəcəyik. Bu, Müşahidə Şurasının qərarıdır. Ola bilər ki, buna görə qarşıdakı bir-iki mövsümdə nəticələrimiz ürəkaçan olmasın. Əminəm ki, azarkeşlərimiz də bizi başa düşəcəklər. Biz güclü kollektiv yaratmaq istəyirik.
- Tənqidlərə hazırsınız?
- Biz ona hazırıq. Əsas odur ki, sonra nəticə olsun. Yerli futbolçulara da inanmaq lazımdır. Biz adicə "Qarabağ"la final oyununda toparlanmağı bacarmayan legionerləri də gördük.
- Elvin Yunuszadə komandada qalacaq?
- Biz bu məsələyə hələ baxmamışıq. Yəqin ki, yaxın günlərdə onun da taleyinə aydınlıq gələcək.
- Samir Əliyevin qarşısına hansı hədəf qoyulub?
- Konkret hədəf qoyulmayıb. Şübhəsiz ki, indiki çətin vəziyyəti nəzərə almaq lazımdır. Əlbəttə, başlanğıc üçün bir mərhələ keçmək tapşırığı olacaq. Ondan sonra isə iştah artacaq və komanda davamını gətirməyə çalışacaq.
