Məhəmməd Mirzəbəyov: Bütün rəqiblərə qarşı Serbiya ilə matçın ilk hissəsindəki kimi oynamağımız lazımdır
Azərbaycan yığmasının müdafiəçisi Məhəmməd Mirzəbəyovun azerisport.az saytına müsahibəsi
- Serbiyaya 1:4 hesablı məğlubiyyətə nə səbəb oldu?
- Yaxşı oynadıq. Amma öz səhvlərimiz ucbatından qollar buraxdıq. Ötürmələrdən daha çox istifadə etməyə çalışdıq. Keyfiyyətli futbol oynamağa üstünlük verdik. Amma təəssüf ki, sonda belə bir məğlubiyyətlə üzləşdik.
- Birinci hissədə komanda pis təsir bağışlamadı. İkinci hissədə bunun davamını gətirməyə gücünüz çatmadı, ya əvəzetmələr özünü doğrultmadı?
- Böyük ehtimalla gücümüz çatmadı. Belə oyunçulara qarşı oynamaq ağır idi. Serblər fiziki cəhətdən daha güclüdürlər. Buna baxmayaraq, topu özümüzdə saxlaya bilirdik. Rəqib qolları daha çox bizim səhvlərimiz nəticəsində vurmağa nail oldu.
- İlk dəfə start heyətdə yer almışdınız. Öz oyununuzdan razı qaldınız?
- Öz oyunuma qiymət verə bilmərəm. Buna məşqçilər korpusu, azarkeşlər qərar verə bilər. Komanda yoldaşlarım kimi, mən də müsbət nəticəyə nail olmaq üçün əlimdən gələni etdim.
- Robert Prosineçki bu oyunda xeyli dəyişiklik etdi. Sonadək meydanda olacağınızı gözləyirdiniz?
- Düzünü desəm, gözləmirdim. Amma 90 dəqiqə meydanda olmağım heç nəyin göstəricisi sayıla bilməz.
- Deməli, Norveçlə oyunda belə şans qazanacağınıza tam inanmırsınız?
- Maksim Medvedev də indi yaxşı formadadır. Malta ilə oyunda da yaxşı təsir bağışlamışdı. Norveçə qarşı hansımızın oynayacağını Osloda biləcəyik.
- 1:4 hesablı məğlubiyyət Norveçlə oyun öncəsi komandada atmosferə mənfi təsir etməyib?
- Əlbəttə, hər bir futbolçu, məşqçi məğlubiyyətə görə üzülür. Uduzmaq həmişə xoşagəlməzdir. Özü də yığma komanda ilə uduzmaq ikiqat üzücü olur. Lakin biz bu məğlubiyyəti unudub, qarşıdakı vacib oyuna yaxşı hazırlaşmalıyıq. Serbiyaya məğlubiyyət bizim Norveçlə oyuna hazırlığımıza mane olmamalıdır.
- Serblərlə oyunun birinci hissəsində sərgilədiyiniz futbolla Norveçlə görüşdə uğurlu nəticəyə ümid etmək olar?
- Fikrimcə, bütün rəqiblərə qarşı elə son görüşün birinci hissəsindəki kimi oynamaq lazımdır. Prosineçki bizdən diqqətli oynmağı, kombinasiyalı futbol sərgiləməyi tələb edir. Əsas olan da məhz baş məşqçinin tələb etdiyi kimi oynamaqdır. Belə olan halda müsbət nəticəyə ümid etmək olar.
