Muarem Muarem: Qarabağ yeni müqavilə təklif etsə də, razılaşa bilmədik
"Qarabağ"ın yarımmüdafiəçisi Muarem Muaremin azerisport.az saytına müsahibəsi
- "Neftçi" ilə final oyunu barədə nə deyə bilərsiniz?
- Bu oyun bizim üçün çox vacib idi. "Neftçi" ilə görüşlərimiz həmişə çətin keçib. Bu mövsüm çempionat oyunlarında onlara qarşı yaxşı çıxış etmişdik. Yaxşı ki, kubokda da uğur qazana bildik. Bundan yaxşı nəsə ola bilməzdi.
- Sizə elə gəllmir ki, erkən qol bu görüşün taleyinə böyük ölçüdə təsir etdi?
- Düşünmürəm. Bizə istənilən halda çətin idi. Çempionatdakı oyunda da onlara 2:0 hesabıyla qalib gəlirdik, amma onlar hesabı bərabərləşdirdilər.
- Həmin aqibəti yenidən yaşayacağınızdan qorxurdunuz?
- "Neftçi" qol vurandan sonra təbii ki, bir qədər həyəcan artdı. Amma biz yaxşı oynadıq. Üçüncü qolu vurduqdan sonra isə sakitləşdik.
- Siz finala "Qarabağ"ın heyətindəki son oyununuza çıxdığınız üçün mütləq qol vurmaq istəyirdiniz...
- Birincisi, hələ bu komandada son oyunuma çıxdığımı dəqiq demək olmaz. Gələcəkdə nəyin necə olacağını bilmək olmur. İkincisi, hələ mən "Əskişəhərspor"la razılığa gəlməmişəm.
- "Qarabağ" sizə yeni müqavilə təklif edib?
- Bəli. Amma biz hələ bəzi məsələlərdə razılığa gələ bilmədik. Problem yoxdur. Mən burada üç il oynadım, yaxşı matçlar keçirdim, avrokuboklarda iştirak etdim, çempionatda və kubokda qalib gəldim.
- "Qarabağ"dan getdiyinizə görə təəssüflənmirsiniz?
- Müəyyən baxımdan təəssüflənirəm. Çünki burada çoxlu dostum var. Amma mən futbolçuyam və belə keçidlərə hazır olmalıyam.
