Aqil Məmmədov: Belə oyunla Avroliqada heç nə edə bilmərik

"Neftçi"nin qapıçısı Aqil Məmmədovun azerisport.az saytına müsahibəsi

- "Qarabağ"a kubokun finalındakı məğlubiyyətlə bağlı nə deyə bilərsiniz?
- "Qarabağ"ı layiqli qələbə münasibəti ilə təbrik edirəm. Ümid edirəm ki, "Qarabağ" da, "Neftçi" də Azərbaycanı avrokuboklarda layiqincə təmsil edəcək. Amma biz orada belə oyunla oynamamalıyıq.

- "Neftçi"yə bu oyunda layiqli mübarizə aparmağa nə mane oldu ki?
- Bizim oyunumuz qətiyyən alınmadı. Belə rəqibə qarşı layiqli mübarizə aparmaq üçün gərək öz oyununu ortaya qoyasan. Bu isə bizdə alınmadı.

- Demək olar ki, erkən qol "Neftçi"ni "sındırdı"?
- Deməzdim ki, məhz bu qol oyunda dönüş nöqtəsi oldu. Amma təbii ki, təsirsiz də ötüşmədi.

- Rəqib azarkeşlər sizin oyundan öncəki açıqlamalarınızı ələ salıb gülürdülər...
- Azarkeşlər istədiklərini edə, deyə bilərlər. Bunda ciddi bir şey görmürəm.

- "Neftçi" bu mövsüm heç nə qazana bilmədi.
- Bizim bəzi problemlərimiz var idi. Bu problemlərin öhdəsindən gələ bilmədiyimizə görə, heç nə edə bilmədik. Amma ən azından Avropa Liqasına vəsiqə qazana bildik.

- Avropa Liqasında sizdən nə gözləyək?
- Bu oyunla heç nə. Amma dəyişikliklər olacaq. Ona görə zamanla hər şeyin daha yaxşı olacağını düşünürəm.