Vidadi Rzayev: Hamımızın bir hədəfi var - Kəpəzi güclü komandaya çevirmək!
Azərbaycanın veteran futbolçusu Vidadi Rzayevin azerisport.az saytına müsahibəsi
- "Neftçi" və "Qarabağ"ın veteranları arasında ötən gün baş tutan yoldaşlıq matçı ilə bağlı təəssüratlarınızı bilmək istərdik...
- Bütün təşkilatçılara minnətdarlığımı bildirmək istərdim. Çox gözəl oyun alındı. 1996-cı ildə biz qələbə qazanmışdıq. Bu gün isə heç-heçə qeydə alındı.
- Bəs bu il baş tutacaq finalda hansı komandanı favorit hesab edirsiniz?
- Qoy güclü olan qalib gəlsin. Həm "Neftçi", həm də "Qarabağ" mənə doğma komandadır. Hər ikisinə uğurlar arzulayıram.
- Yəni, favorit yoxdur?
- Bu, finaldır, belə oyunlarla bağlı dəqiq proqnoz vermək çətindir. Çempionatdakı oyunlarla bu görüşü müqayisə etməyə də dəyməz. Burada hər şey fərqli olacaq. Şansları əllinin əlliyə hesab edirəm. Hətta əlavə vaxt və penalti seriyası da ola bilər.
- Amma "Qarabağ"ın kapitanı Rəşad Sadıqov "Neftçi"nin favorit olduğunu deyib...
- O, belə danışmalıdır, mən onu başa düşürəm (gülür).
- "Kəpəz"də bundan sonra nə işlə məşğul olacaqsınız?
- Məni 19 yaşadək futbolçulardan ibarət komandalara idman direktoru təyin ediblər.
- Niyə sizinlə baş məşqçi kimi yeni müqavilə imzalamadılar?
- Əsas problemlərdən biri mənim sadəcə, B kateqoriyalı məşqçi lisenziyamın olmasıdır. Öncə A, sonra isə Pro kateqoriyasını almalıyam. Komandanın yeni baş məşqçisi Şahin Diniyevə uğurlar arzulayıram. Bizim hamımızın bir hədəfi var - "Kəpəz"i güclü komanda etmək.
- Komandanın bir müddət ev oyunlarını Bakıda keçirmək məcburiyyətində qalması sizi narahat etmir?
- Şəhər icra hakimiyyəti bizim ev oyunlarımızı Gəncədə keçirməyimiz üçün əlindən gələni edir. Ola bilər ki, ilk oyunumuzu elə öz stadionumuzda keçirək. Baxaq, görək necə olacaq.
- Azərbaycan yığmasının Serbiya və Norveçlə oyunlarından nə gözləyirsiniz?
- Berti Foqtsdan fərqli olaraq, Robert Prosineçki demək olar ki, Azərbaycanda yaşayır. Bu, çox yaxşıdır. Çox istərdim ki, onda hər şey alınsın və komandamız Norveçdən yaxşı nəticə ilə qayıtsın.
