Aslan Kərimov: Kuboku Qarabağ qazanacaq
Azərbaycanın veteran futbolçusu Aslan Kərimovun azerisport.az saytına müsahibəsi
- Ötən gün Azərbaycan Kubokunun 19 il əvvəlki kubokun finalçılarının yoldaşlıq görüşü baş tutdu. Yenidən həmin futbolçularla meydanda üz-üzə gəlmək necə idi?
- Həmin dövrü yenidən yada salmaq xoş idi. Meydana demək olar ki, həmin heyətdə yer alan futbolçular çıxmışdılar. Nostalji hisslər yaşadıq.
- Yoldaşlıq görüşlərində nəticə adətən öncədən razılaşdırılır. Bu oyunda da elə idi?
- Xeyr. Sadəcə, matçın sonlarında yorğunluq var idi. Çünki artıq çox qaçacaq yaşda deyilik.
- "Neftçi" ilə "Qarabağ" arasındakı final görüşündən nə gözləyirsiniz?
- Təbii ki, favorit "Qarabağ"dır. Onlar bu görüşə daha az itki ilə çıxacaqlar. Mənəvi baxımdan da hazırda onlar daha yaxşı vəziyyətdədirlər. Çempionatda da qələbə qazanıblar. İtiriləsi heç nələri yoxdur. "Neftçi"də isə hər şey fərqlidir. Premyer Liqada da 4-cü olduqlarını nəzərə alsaq, vəziyyətləri elə də yaxşı deyil. İndi çempionatdakı uğursuzluğu unutdurmaq üçün kuboku qazanmaq vacibdir. Flavinyonun yoxluğunu da qeyd etmək lazımdır.
- Bütün müsbət və mənfi məqamları nəzərə alsaq, proqnozunuz necədir?
- "Qarabağ"ın böyük hesabla qalib gələcəyini gözləmirəm. Amma bu komanda kuboku qazana bilər. Üstünlüyü məhz bu komandaya verirəm.
- Bir neçə gün sonra Azərbaycan yığması Serbiya ilə yoxlama matçında üz-üzə gələcək. Bu görüşlə bağlı nə düşünürsünüz?
- Çox çətin olacaq. Amma bu oyundakı nəticə göstərici sayılmamalıdır. Sadəcə, bu oyunda biz komandanın Norveçlə seçmə mərhələ oyununa nə dərəcədə hazır olduğunu görəcəyik.
- Norveçdən xal ala bilərik?
- Ola bilər. Bakıdakı oyunda xal alabilərdik. Amma həmin görüşdə rəqib komandanın necə güclü olduğunu hamı gördü. Bu dəfə isə oyun Osloda baş tutacaq. Adətən belə texnikalı komandalarla oyunlar bizim üçün daha çətin olur. Çox ağır olacaq. Çünki Robert Prosineçki hələ öz komandasını tam formalaşdıra bilməyib. İndi daha çox Berti Foqtsun komandası oynayır.
- Bəs sizcə, Prosineçkinin komandasını nə vaxt görəcəyik?
- Daha 3-4 aya ehtiyac var. Əlbəttə, onun ideyalarını artıq görmək olur. Amma bunu xorvatın komandası saymaq olmaz. Təxminən sentyabra qədər formalaşma davam edəcək.
