Qara Qarayev: Rəşad Sadıqov Neftçi ilə bağlı dediyində haqlı idi
"Qarabağ"ın yarımmüdafiəçisi Qara Qarayevin azerisport.az saytına müsahibəsi
- Kubokun finalına hazırlıq necə gedir?
- Hər şey yaxşıdır. Əsas odur ki, zədəlimiz yoxdur. Bu, bizi çox sevindirir. Hazırlığımız da plan üzrə gedir.
- Final matçı barədə nə düşünürsünüz?
- Motivasiya çox yüksəkdir. Bu, mənim üçün ilk final matçı olacaq. Allah eləsin ki, uğurlu alınsın.
- Komandanızın kapitanı Rəşad Sadıqov bəyan edib ki, finalın favoriti "Neftçidir, amma əks düşərgədə fərqli düşünürlər. Bəs siz necə düşünürsünüz?
- Fikrimcə, Rəşad haqlıdır, favorit "Neftçi"dir. Çünki bu komanda kubokun finallarında çox uğurlu çıxış edir.
- Amma "Neftçi" bu mövsüm komandanıza qalib gələ bilməyib. Çox güman ki, bu fakt rəqib komanda üzərində təzyiq də yarada bilər. Bu isə sizin üçün müsbət məqamlardan sayılmalıdır.
- Mən isə əksini düşünürəm. Bu, "Neftçi"nin meydana daha böyük istəklə çıxacağını deməyə əsas verir. Onlar mövsümün son oyununda qələbə qazanmağa çalışacaqlar.
- "Qarabağ" çempionluqla kifayətlənəcək, ya "qızıl dubl" etməyi çox istəyir?
- Əlbəttə, hamımız "qızıl dubl"a imza atmağı çox istəyirik. Hər iki cəbhədə uğura imza atmaq çox gözəl olardı. Bunun üçün əlimizdən gələni edəcəyik. Ümid edirəm ki, istəyimizə çatacağıq. Qarşıda bizi çətin 90 dəqiqə gözləyir. Mümkündür ki, oyun 120 dəqiqə də davam etsin.
- "Qarabağ"ın yeni transferlərindən Coşqun Diniyevlə Vüqar Mustafayev sizin mövqeyinizdə çıxış edir. Bu, komandada rəqabəti artıracaq?
- Mövqelərimiz eyni olsa da, düşünmürəm ki, onlar mənim mövqeyimdə oynamaq üçün götürülüb. Onlar sadəcə, komandamıza kömək etmək üçün alınıblar. Əminəm ki, onlar bizə çox faydalı olacaqlar. Çünki həm Coşqun, həm də Vüqar yaxşı futbolçudur. Rəqabət burada həmişə güclü olub.
- Ola bilər ki, Qurban Qurbanov artıq sizi hansısa xarici klubda gördüyü üçün mövqeyinizə birdən-birə iki yeni futbolçu alıb?
- Bunu bilmirəm. Qurban Qurbanov bizimlə çox yaxındır. Lazım olsaydı, xarici kluba keçməyimlə bağlı söhbət edərdi. İndi isə buradayıq və komandamıza kömək etmək lazımdır.
