Ağabala Ramazanov: Mənə saqqalımı qırxmağı tapşırıb, 24 min əvəzinə 4 min ödədilər

"Xəzər Lənkəran"ın hücumçusu Ağabala Ramazanov komandasının son mövsümdəki çıxışı, klubun maliyyə vəziyyəti, eləcə də qarşıdakı planları barədə danşıb. Azerisport.az saytına açıqlamasında o, öncə bunları söyləyib:

"Artıq 4 aydır maaş almırıq. Ötən dəfə 4 aylıq maaşımı almağa gedəndə 24 000 dollar əvəzinə mənə cəmi 4 min ödədilər. Deyirlər ki, saqqalını qırx. Başa düşə bilmirəm nə məsələdir. Müsəlman saqqal saxlamalıdır da. Biz vəhabi deyilik, terrorçu deyilik. Dekabrdan bəri pul almırdım, axırı da belə. Bu, hansı ölkədə mümkündür? Hansı klubda bu qədər borc saxlamaq, sonda da bunu saqqal saxlamaqla bağlamaq olar?"

Ramazanovun sözünə görə, futbolçular xərclərini özləri çəkirlər: "Yaşadığımız mənzillərin kirayəsini də özümüz ödəmişik. Müxtəlif ethiyaclarımız olur ki, öz cibimizdən pul xərcləməli oluruq. Düşünməyin ki, "Xəzər Lənkəran"da hər şey yaxşıdır. Bizə hətta bir ara deyirdilər ki, bazada qalmaq istəyirsinizcə, 1000 dollar ödəyin, qalın. Məgər belə şey olar?"

"Bir neçə gün zədəli oldum. Amma mənə heç kim zəng edib, maraqlanmadı ki, vəziyyətim necədir. Danışanda isə elə bilirsən ki, superpeşəkarlardırlar. Mən hətta necə evlərdə qaldığımızın şəkillərini də sizə göndərə bilərəm. Uşaqlar 50 qəpiklik sosiskalarla qidalanırlar. Halbuki, bizə ət yemək lazımdır. Son aylarda çox çalışırdıq, amma bizim əziyyətimizə qiymət verən yoxdur".

Klubun mətbuat xidməti isə futbolçunun açıqlamalarına belə münasibət bildirdi: "Komandada gənc futbolçular kifayət qədərdir. Onlara isə nəzarət lazımdır. Biz onların üzlərinin təmizliyinə, saç düzümlərinə, saçlarına gel vurmamağa nəzarət edirik. Məsələ burasındadır ki, gənc futbolçu bu yaşlarında öz xarici görünüşü barədə yox, oyunu haqda düşünməlidir. Amma buna görə heç bir cərimə nəzərdə tutulmayıb. Biz oyunçuları uğursuz oyunlar zamanı cərimə edə bilərik. Həmin cərimələr də yüksək məbləğli olmur".