Qarabağın futbolçuları: Dneprə azarkeşlik edəcəyik, amma favorit Sevilyadır
Bu gün Avropa Liqasının final matçı keçiriləcək. Azerisport.az xəbər verir ki, turnirin həlledici görüşündə İspaniyanın "Sevilya" klubu ilə qrup mərhələsində Azərbaycan çempionu "Qarabağ"ın rəqibi olmuş Ukrayna "Dnepr"i qarşılaşacaq.
Məhz bu üzdən Ağdam klubunun üzvlərindən finalla bağlı proqnozlarını öyrənməyə çalışdıq:
Rəşad Sadıqov: "Dnepr"i yaxşı tanıyırıq. Onların nəyə qadir olduğunu da bilirik. Amma "Sevilya" bu matçın favoritidir. İspanların böyük hesablı qələbəsini gözləyirəm. Ən azından 3:0 hesablı qələbə olacağını düşünürəm. Amma gizlətmirəm ki, ukraynalılara azarkeşlik edəcəyəm".
Namiq Yusifov: "Ukrayna klubuna azarkeşlik edəcəyəm. Final oyunlarının necə bitəcəyini öncədən demək çətindir. Xüsusilə də "Dnepr" kimi komandanın oynadığı görüşdə. Çünki onların finala çıxacağını çox az adam gözləyərdi. "Sevilya"ya da qalib gəlmək bu komanda üçün çox çətin olacaq. Çünki İspaniya klubu çox təcrübəlidir. Amma yenə də düşünürəm ki, ukraynalılar növbəti dəfə bütün Avropanı təəccübləndirə bilərlər".
Maksim Medvedev: "Məncə, Avroliqanın qalibi "Sevilya" olacaq. Amma mən "Dnepr"ə azarkeşlik edəcəyəm. Baxmayaraq ki, onların uğur qazancağına elə də çox inanmıram. Əminəm ki, bu komanda yenə müdafiə futboluna üstünlük verəcək. Qollu oyun olacağını düşünmürəm. Maksimum, 3 qol vurula bilər".
Vüqar Nadirov: "Dnepr"in finala çıxması mənim üçün xoş oldu. Çünki biz bu komandaya qalib gəlmişdik. Finalda Ukrayna klubuna azarkeşlik edəcəyəm. Amma "Sevilya"nın onlara şans verəcəyini düşünmürəm. "Dnepr"in necə şanslı komanda olduğunu nəzərə aldıqda isə, finalda hər şeyin baş verməsini gözləmək olar. Bu komanda finala qədər elə qollar vurub ki, adam istər-istəməz hakimlərin həmin vaxt nə işlə məşğul olduğunu düşünür".
Bədavi Hüseynov: "Bu matçın favoriti "Sevilya"dır. Amma futbolda hər şey ola bilər. "Dnepr"in də qələbə qazanmaq şansı var. Mənə elə gəlir ki, maraqlı oyun olacaq. "Dnepr" müdafiə futboluna üstünlük verirsə, "Sevilya" da hücum futbolu sərgiləyir. Onların oyun üslubu xoşuma gəlir".
