Əsgər Abdullayev: AFFA Məşqçilər Komitəsinin işini müsbət qiymətləndirirəm
Azərbaycan yığmasının sabiq baş məşqçisi Əsgər Abdullayevin azerisport.az saytına müsahibəsi
- Ötən gün Nazim Süleymanovun 50 illik yubileyi münasibətilə Azərbaycan və Vladiqafqaz "Alaniya"sının veteranları arasında yoldaşalıq görüşündə iştirak etmisiniz. 7:7 hesablı heç-heçəni öncədən razılaşdırmışdınız?
- Hər şey yüksək səviyyədə təşkil olunmuşdu. Nəticəyə gəlincə, bu, belə oyunlarda elə də vacib əhəmiyyət daşımır. Adətən, belə görüşlər məhz heç-heçə bitir. Oyundan sonra komandaları otelə aparan avtobusları azarkeşlər sonadək müşaiyət etdilər. Xoş məqamlar çox idi. Süleymanova orada çox hörmət edirlər.
- Belə bir məlumat yayılıb ki, "Kəpəz"ə baş məşqçi təyin olunan Şahin Diniyevi Məşqçilər Komitəsində siz əvəz edəcəksiniz. Bu, düzdür?
- Mənə bu barədə heç kim bir söz deməyib. Ona görə də bu sualınızı şərh edə bilmərəm.
- Məsələ burasındadır ki, bu komitəyə məhz işsiz mütəxəssislər dəvət olunur. Siz bununla bağlı təklif alsanız, qərarınız necə olacaq?
- Belə xəbərlər tez yayılır. Ola bilər ki, kimsə məndən də öncə xəbər tutsun. Amma bu barədə yalnız hər şey dəqiqləşəndən sonra danışa bilərəm.
- Ümumiyyətlə, bu komitənin fəaliyyətini necə qiymətləndirərdiniz?
- Müsbət qiymətləndirirəm. Bu, ən azı yığma məşqçiləri üçün bir köməkdir. Çünki onlar bütün oyunları izləyə bilmirlər. Həm dənəzərə almaq lazımdır ki, Məşqçilər Komitəsində çalışanların hər biri təcrübəli mütəxəssisdir və yığma komandalarda da çalışıblar.
- "Bakı", "Simurq" və "İnter" imi klubların ciddi maliyyə problemləri ilə üz-üzə olması sizi narahat etmir?
- Bu, bizi narahat etməyə bilməz. Maliyyə problemləri təkcə klublara yox, bütövlükdə Azərbaycan futboluna mənfi təsir göstərir. Ümid edirəm ki, bu klublar yaşayaaqlar. Bundan sonra necə olacağını ancaq zaman göstərəcək.
- Bu mövsümün zəif keçdiyini nəzərə alsaq, klublarımızdan avrokuboklarda nə gözləyək?
- Ümid edirəm ki, "Qarabağ" iddialı olacaq. Onlar uğurlu çıxış etməyi bacardılar. Göstərdilər ki, klublarımız təkcə ölkə daxilində yox, Avropada da uğur qazana bilərlər. Bunun bütün klublarımıza nümunə olacağını düşünürəm.
