Topaz Premyer Liqasında 35-ci tur həyəcanı

Bu gün Topaz Premyer Liqasında 35-ci turun oyunları keçiriləcək. Azerisport.az xəbər verir ki, eyni gündə baş tutacaq turun mərkəzi oyununda mövsümü ilk 2 pillədə başa vuran “Qarabağ”la “İnter” qarşılaşacaq.

Bu komandalar indiyə qədər 42 dəfə üz-üzə gəliblər. Bunların 18-də gülən tərəf "Qarabağ" olubsa, 9 oyunda da “İnter” qələbəni bayram edən tərəf olub. Qalan 15 görüşdə isə qalib müəyyənləşməyib. Top fərqində də ağdamlıların böyük üstünlüyü var - 46:26. Rəqiblərin son 3 oyununda qol vurulmayıb. Belə ki, bu mövsümə təsadüf edən həmin qarşılaşmaların üçündə də eyni hesab qeydə alınıb - 0:0. “Qarabağ” 18 matçdır rəqibinə məğlub olmur. “İnter” son 2 ev oyununda qol vura bilməyib. Bu dəfə necə olacağı maraqla gözlənilir.

Üçüncü olmaq üçün mübarizə aparan "Neftçi" bu tur səfərdə “Bakı” ilə qarşılaşacaq. Bu klublar da indiyə qədər 49 dəfə üz-üzə gəliblər. Paytaxt derbilərində "ağ-qaralar"ın daha çox qələbə qazandığının şahidi oluruq - 29 dəfə. Bakının eyniadlı təmsilçisi 11 dəfə belə uğura imza atıbsa, qalan 9 qarşılaşmada qalib müəyyənləşməyib. Top fərqi də "Neftçi"nin xeyrinədir - 70:41. Yubiley – 50-ci oyunda da “Neftçi” favoritdir. Bu komanda son 4 qarşılaşmada qalib gəlib. Bu mövsümə təsadüf edən son üç oyunda "ağ-qaralar"ın 1:0, 3:1 və 2:0 hesablı qələbələri qeydə alınıb. Tərəflərin ardıcıl 8 oyununda heç-heçə qeydə alınmır. “Bakı” son 7 ev oyununda qol sevinci yaşayıb.

“Sumqayıt” doğma meydanda “Xəzər Lənkəran”la münasibətlərinə aydınlıq gətirəcək. Tərəflər arasında indiyə qədər baş tutmuş 13 oyununda cənub təmsilçisi daha çox - 7 dəfə qələbə qazanıb. 4 görüşdə heç-heçə qeydə alınıbsa, yalnız 2 qarşılaşmada sumqayıtlılar 3 xala seviniblər. Top fərqi də "Xəzər Lənkəran"ın xeyrinədir - 23:14. Komandaların son 6 oyununda heç-heçə qeydə alınmayıb. “Sumqayıt” ardıcıl 4 matçda meydanı qolsuz tərk etməyib. “Xəzər Lənkəran” son 2 qarşılaşmada qalib gəlib. Bu mövsümə təsadüf edən oyunlara gəlincə, Lənkəranda baş tutmuş ilk oyunda "Sumqayıt" 1:0 hesabıyla üstün olub. Son iki qarşılaşmada isə cənublular 2:1 və 3:2 hesablı qələbəyə seviniblər.

AZAL isə Şüvəlanda “Simurq”la qarşılaşacaq. Paytaxt və Zaqatala təmsilçiləri indiyədək 25 oyunda üz-üzə gəliblər. Tərəflər daha çox (10 dəfə) heç-heçəyə razılaşmalı olublar. 8 oyunda bakılılar, 7 oyunda isə zaqatalalılar qələbəni bayram ediblər. Top fərqində də Şüvəlan klubunun azacıq üstünlüyü diqqət çəkir - 28:26. “Simurq” son 3 oyunda meydanı qolsuz tərk etməyib. Zaqatala təmsilçisi son 4 səfərdə də rəqib qapısına yol tapıb. AZAL 10 görüşdür rəqibinə qalib gələ bilmir. Bu mövsüm baş tutan görüşlərə gəlincə, "Simurq" öz meydanındakı ilk oyunda 2:0, ikincidə isə 1:0 hesabıyla qalib gəlib. Bakıdakı ilk görüşdə isə 2:2 hesablı heç-heçə qeydə alınıb.

Topaz Premyer Liqası
35-ci tur
22 may (cümə)

“Sumqayıt” – “Xəzər Lənkəran”
Hakimlər: Orxan Məmmədov, Knyaz Əmiraslanov, İsgəndər Əliyev, Elvin Əsgərov.
AFFA nümayəndəsi: Elbrus Abbasov.
Hakim-inspektor: Asim Xudiyev.
Sumqayıt. “Kapital Bank Arena”, 18:00.

“Bakı” – “Neftçi”
Hakimlər: Rəhim Həsənov, Akif Əmirəli, Kamran Bayramov, Munis Abdullayev.
AFFA nümayəndəsi: Mübariz Hüseynov.
Hakim-inspektor: Səfər Haşımov.
“Bakı” FK-nın təlim-məşq bazasının stadionu, 18:00.

AZAL – “Simurq”
Hakimlər: Fariz Yusifov, Nahid Əliyev, Coşqun Həsənov, Ramil Əhmədov.
AFFA nümayəndəsi: Sakin Məmmədzadə.
Hakim-inspektor: Gülağa Cabarov.
Bakı. “AZAL Arena”, 19:00.

“İnter” – “Qarabağ”
Hakimlər: İnqilab Məmmədov, Mübariz Haşımov, Yaşar Abbasov, Əliyar Ağayev.
AFFA nümayəndəsi: Maşallah Əhmədov.
Hakim-inspektor: Əli Hüseynov.
Bakı. “İnter Arena”, 20:00.

Bombardirlər:
15 - Nurlan Novruzov ("Bakı").
14 - Draqan Çeran ("Simurq").
11 - Nikolas Kanales ("Neftçi"), Cavid Hüseynov ("Qəbələ").
10 - Məhəmməd Qurbanov (“Sumqayıt”), Reynaldo Silva ("Qarabağ").