Şahin Diniyev: Kəpəz ortabab klub olmamalıdır
AFFA Məşqçilər Komitəsinin üzvü Şahin Diniyevin azerisport.az saytına müsahibəsi
- "Kəpəz"dən aldığınız təkliflə bağlı nə deyə bilərsiniz?
- Mən Gəncədə çalışmışam. Bu bölgədə futbol ənənələrinin yaşaması mənim üçün də çox vacibdir. Bunun üçün çox çalışmaq lazımdır. Müəyyən vaxt da lazımdır. Komandanı sıfırdan yığmalı olacağıq. Məni çətin iş gözləyir. Amma buna alışmışam. İlk müsahibəmdəcə böyük işlərdən danışmaq istəməzdim. Sadəcə, onu deyə bilərəm ki, Gəncədə futbol olmasa, Azərbaycan futbolunda problemlər həmişə olacaq.
- Müqavilə imzalamısınız?
- Klub rəhbərliyi ilə görüşdük. Onlarla ilkin razılığa gəlmişik. Tezliklə görüşüb görüləcək işlərlə bağlı digər planlarımızı müzakirə edəcəyik.
- İşinizə nə vaxtdan başlayacaqsınız?
- İyulun 1-dən yeni komanda yaratmağa başlayacağıq. Amma təbii ki, həmin vaxta qədər də müəyyən işlər görülməlidir. İşimiz çoxdur.
- Yəqin ki, komandanın gələcək sponsoru sizi maraqlandırmaya bilməz. Bu baxımdan işlər necədir?
- Bununla klub rəhbərliyi məşğul olacaq. "Kəpəz" ortabab klub olmamalıdır. Təbii ki, hələ "Qəbələ", "İnter", "Neftçi" və "Qarabağ"ın səviyyəsindən danışa bilmərik. Amma buna çalışmalıyıq. İlk addımlar çox önəmli olacaq.
- Komandanın indiki baş məşqçisi Vidadi Rzayevin sizin köməkçilərinizdən biri olacağını demək olar?
- Biz birlikdə futbol oynamışıq. Bu barədə hələ düşünməmişik. Amma klubda onun da işi olacaq. Klubun prezidenti var, Rzayevin məsələsini də o həll edəcək. Futbol qalmayacaq.
- "Kəpəz" Gəncədəki stadionun pis vəziyyətdə olması səbəbindən ev oyunlarını "Dalğa Arena"da keçirəcək. Amma bu, azarkeşlər tərəfindən narazılığa səbəb olub...
- Kənardan danışmaq çox asandır. Amma reallıq da var. Əlbəttə, "Kəpəz" birdəfəlik paytaxta köçən deyil. Biz yaxşı klub yaratmaq istəyiriksə, onun öz bazası, stadionu da olmalıdır. Təxminən 4 ay Bakıda məskunlaşmalı olacağıq. Bizə Yevlaxda yerləşməyi təklif edirlər. Amma orada məşq etmək üçün normal şəraitimiz olacaqmı? 4-5 aydan sonra yenidən Gəncəyə qayıdacağıq. Azarkeşlərsiz "Kəpəz" heç nədir.
- Məşqçilər Komitəsindən avtomatik olaraq çıxırsınız?
- Hələ ki, buradayam. Çünki "Kəpəz"dəki işimə başlmamışam. Sonra baxarıq. Düzünü desəm, heç bu barədə düşünməmişəm. Məşqçilər Komitəsi necə qərar qəbul etsə, elə də olacaq.
- Oğlanlarınıza da "Kəpəz"də oynamağı təklif edəcəksiniz?
- Bundan söhbət belə gedə bilməz.
