Ansi Aqolli: Özümüzə və rəqiblərimizə hörmətlə yanaşmağımız lazımdır
"Qarabağ"ın müdafiəçisi Ansi Aqollinin azerisport.az saytına müsahibəsi
- Ötən həftə çempionluğunuzu təmin etdiniz. Təəssüratlarınız...
- Fikrimcə, biz çempionluğa layiq idik. Çünki bütün mövsüm ərzində birinci pilləni qoruyub saxladıq və digər komandaların zirvəyə çıxmasına imkan vermədik.
- Amma "Sumqayıt"la son oyun çox çətin alındı...
- Özünüz də hər şeyi gördünüz. "Sumqayıt"a qarşı oynamaq həmişə çətin olub. Amma biz öz futbolumuzu sərgiləməyə çalışdıq. Hesab daha böyük ola bilərdi. Çünki xeyli qol epizodu yaratdıq. Əsas odur ki, sonda vacib olan üç xalı qazana bildik.
- "Qəbələ" - "İnter" matçının bitməsini gözləyərkən nə hiss etdiniz?
- Çox gərgin idik. Hər şeyin mümkün qədər tez bitməsini istəyirdik. Hadisələrin arzuladığımız kimi bitməsinə çox sevindik.
- Hansı çempionluq sizin üçün daha çətin sayıla bilər?
- Hər çempionluq çətindir. Çempion olmaq istəyirsənsə, hər şey hazır olmalısan. Yəqin ki, bu mövsümkü çempionluq daha çətin sayılmalıdır. Çünki mövsümün yarısını eyni zamanda Avropa Liqasında oynamaqla keçirdik.
- Qarşıda sizi "İnter"lə oyun gözləyir. Bu oyun sizin üçün hansısa əhəmiyyət kəsb edir?
- Bu oyuna çempionluğun taleyi sual altındaymış kimi çıxacağıq. Çempionluğu təmin etməyimiz bundan sonrakı oyunlara arxayın çıxmağımıza əsas vermir. Həm özünə, həm də rəqibə hörmətlə yanaşmalısan.
- Bu mövsüm "Qarabağ" üçün ən çətin oyun hansı oldu?
- Bütün oyunlar çətin keçdi. Bir dənə də asan keçən oyunumuz olmadı. Amma təbii ki, "Neftçi", "İnter" və "Qəbələ"yə qarşı oyunlarımız daha çətin alındı.
- Kubokun final oyunundan nə gözləyirsiniz?
- Bu, Azərbaycan futbolu üçün böyük oyun olacaq. İstərdim və ümid edirəm ki, bizdə hər şey yaxşı alınacaq.
