Elvin Məmmədov: Ölkəni tərk etsəm, hədəfləri yüksək olan klubda oynamaq istərəm
"İnter"in yarımmüdafiəçisi Elvin Məmmədovun azerisport.az saytına müsahibəsi
- "Qarabağ"la oyuna hazırlıq necə gedir?
- Hər şey normaldır. Sona iki tur qalıb, xallar toplamalıyıq. Artıq çempionluq şansımız qalmasa da, yenə qələbəyə oynayacağıq.
- Mövsümü ikinci pillədə başa vuracağınız dəqiqləşdiyi halda hansı motivasiya ilə oynayacaqsınız?
- Niyə də yox? Əlbəttə, motivasiya var. İlk iki pillədə qərarlaşan komandalar qarşılaşırsa, deməli, matç heç də sıradan bir qarşılaşma olmayacaq. Təbii ki, rəqibi çempionluq münasibəti ilə təbrik edəcəyik. Amma rəqibə asanlıqla təslim olmaq fikrimiz yoxdur.
- Bütövlükdə bu mövsümü komandanız üçün necə qiymətləndirə bilərsiniz?
- Fikrimcə, ikinci pillə ilə fəxr edə bilərik. Bizim əsas məqsədlərimizdən biri avrokuboklara vəsiqə qazanmaq idi. Ona da nail olmuşuq.
- Bəs özünüz üçün?
- Fikrimcə, hər şey yaxşı oldu. Əlbəttə, alınan oyunlarım da oldu, alınmayan görüşlər də. Amma bu il ötənilkindən daha yaxşı keçdi. Bu, dəqiqdir.
- "İnter" yeni mövsümə yeni baş məşqçi ilə başlayacaq. Yəqin ki, komandada hansısa dəyişikliklər olacaq...
- Hələ hər şeyin necə olacağını dəqiq bilmirəm. Ona görə indidən nəsə demək olmur. Hələ gözləyirik. Fikrimcə, çempionat başa çatandan sonra hər şey müəyyənləşəcək.
- Digər klublardan təklif var?
- Mətbuatda digər klublara keçəcəyim barədə çoxlu məlumat yazırlar. Amma belə bir şey yoxdur. Rəsmi təklif olsaydı, danışıqlar masasına əyləşmək olardı.
- Ölkə xaricində oynamaq fikriniz yoxdur?
- Təklif yoxdur. Türkiyə klubları maraqlanır. Amma mən hədəfləri yüksək olan komandada oynamaq istərdim. Məsələn, Kamran Ağayev "Kayserispor"a keçməklə düzgün addım atdı. Komandası Super Liqaya çıxdı. Onu bu uğur münasibətilə təbrik edirəm.
- Klubdakı maliyyə vəziyyəti düzəlməyib?
- Hamıya məlum olduğu kimi, vəziyyət heç də yaxşı deyil.
- Oyunçuların nə vaxt pulunu alacağı deyilib?
- Hələ konkret bir şey yoxdur. Yaxın zamanlarda hər şeyə aydınlıq gəlməsi mümkündür. Gözləyirik.
