Elvin Camalov: Yığmamızın qarşıdakı oyunlarına dəvət almaq istəyirəm

"Qəbələ"nin yarımmüdafiəçisi Elvin Camalov komandasının çıxışını dəyərləndirib, milli komandamıza dəvət almaq istəyindən danışıb. Azerisport.az saytına açıqlamasında o, bunları söyləyib:

"Təəssüf ki, "İnter"ə qalib gələ bilmədik. Amma heç-heçə də pis nəticə deyil. Son turda "Bakı"ya qalib gələ bilsək, bürünc medallara sahib çıxacağıq. Bütün diqqətimiz məhz bürünc medalları qazanmağa yönəlib. Ötən mövsümkü uğurumuzu təkrarlamaq istərdik. Amma bu, çətin olacaq. Özümə gəlincə, gənc futbolçu kimi özümü yaxşı tərəfdən göstərməyə çalışdım. Qoy qiyməti məşqçilər versinlər. Millimizin Serbiya və Norveçlə qarşıdakı oyunlarına dəvət almağı çox istərdim".