Maksim Medvedev: Bu, bizim üçün bir siqnaldır

"Qarabağ"ın müdafiəçisi Maksim Medvedevin azerisport.az saytına müsahibəsi

- Ardıcıl ikinci dəfə çempion olmaq sizin üçün nə deməkdir?
- Bu uğurumuza çox sevinirəm. Bu mövsüm xeyli çətin oyunumuz oldu. Məşqçilərə, komanda yoldaşlarıma, "Qarabağ"ı sevən hər kəsə təşəkkürümü bildirirəm.

- Bu çempionluq ötən ilki ilə müqayisədə daha çətin oldu, ya əksinə?
- Mənə elə gəlir ki, ötənilki çempionluq daha çətin oldu. Bu dəfə yaxşı xal fərqi yaratdıq. Amma yenə də sonluğun bu qədər gərgin alınacağını gözləmirdik. Hardasa, arxayınlaşdıq. Əsas rəqiblərimizi 10 xal qabaqladığımız vaxt var idi. "İnter"in çempionluqdan əlini üzəcəyini düşünürdük. Lakin onlar sonadək mübarizə apardılar. İstənilən halda mən əvvəlki çempionluğumuzun daha çətin başa gəldiyini düşünürəm.

- Bu mövsüm daha asan çempion olmağınız nə ilə bağlıdır?
- Uğurlu startla. Mövsümə yaxşı başlamağı bacardıq. Eyni zamanda avrokuboklarda da uğurlu çıxış edirdik. Yəqin ki, məhz Avroliqadakı uğurlu çıxışımıza görə idi ki, çempionat oyunlarına daha əminliklə çıxırdıq.

- Qarşıda "İnter"lə oyun var...
- Biz hər oyuna üç xal qazanmaq üçün çıxırıq. Hər oyun bizim üçün vacibdir.

- "Qızıl dubl" etməyi düşünürsünüz?
- "Neftçi" ilə final oyunumuzda şanslar əllinin əlliyədir. Hər şey ola bilər. Oyunun gedişindən çox şey asılı olacaq. "Neftçi"nin bu oyuna daha sakit çıxacağını düşünürəm.

- Keçmiş rəqibiniz "Dnepr"in Avroliqanın finalına vəsiqə qazanması sizin üçün gözlənilməz olmadı?
- Əlbəttə, gözlənilməz oldu. Bu, bizim üçün bir siqnaldır. Deməli, "Qarabağ" da finala çıxa bilər.

- Nəyin sayəsində?
- Biz "Dnepr"lə başabaş mübarizə apardıq, hətta bəzi komponentlərdə onlardan üstün idik.

- Finalda "Dnepr"ə azarkeşlik edəcəksiniz?
- Bəli. Onların qələbələri xoşdur. Çünki bu komandaya qalib gəlmişdik. Gələcək çempionu onun meydanında məğlub etmək həmişə xoş təsir bağışlayır. Baxmayaraq ki, "Sevilya" ilə oyunda bu komandanın şansları çox aşağıdır.