Vidadi Rzayev: Premyer Liqada Kəpəzin sükanı arxasında qalıb-qalmayacağımı bilmirəm
"Kəpəz"in baş məşqçisi Vidadi Rzayevin azerisport.az saytına müsahibəsi
- "Kəpəz" Premyer Liqada oynamaq hüququ qazanandan bəri nə dəyişib?
- Hələ heç nə dəyişməyib. Mövsümün başa çatmasını gözləyirik. Əsas dəyişiklər həmin vaxt olacaq. Maliyyə baxımından müsbət irəliləyiş olacağına ümidliyik. Klubda dəyişiklər olmalıdır.
- Bu dəyişiklik məşqçilər korpusuna da aid olacaq?
- Komandaya Premyer Liqada kimin rəhbərlik edəcəyini dəqiq deyə bilmərəm. Hələlik, baş məşqçi mənəm. Amma gələcəkdə hər şey baş verə bilər.
- Birinci divizionda çıxış etməklə yanaşı, yəqin ki, Premyer Liqanı da izləyirsiniz...
- Premyer Liqa ilə birinci divizion arasında çox böyük fərq, hətta deyərdim ki, uçurum var. Məsələn, Türkiyə PTT 1-ci liqasında çıxış edən əksər klublar Super Liqada da rahat oynaya bilərlər. Amma bizim birinci divizion klubları heyətini gücləndirməsə, elitada heç nə edə bilməz.
- Maliyyə probleminiz olmasa, komandaya neçə legioner transfer etmək istərdiniz?
- Buna rəhbərlik və sponsorlar qərar verəcək. Mən sadəcə, onu deyə bilərəm ki, Premyer Liqada "Kəpəz"in heyətində oynamaq istəyən çox futbolçu var. Fikrimcə, onlardan rəqabətədavamlı komanda formalaşdırmaq olar. Pul olsa, onlar özü bizim heyətdə oynamaq istəyəcəkər. Hətta legionerə ehtiyac duymayan bir komanda formalaşdırmaq da olar. Bu, eyni zamanda Azərbaycan yığması üçün də müsbət addım olacaq Legionerlər bütün klublarda var. "Neftçi", "Qarabağ", "İnter" və başqa klublarımız demək olar ki, legionerlərdən təşkil olunub. Yerlilərə çox az diqqət ayrılır.
- Ancaq yerlilərə güvənməklə klubun iddiasız oması da mümkündür...
- "Sumqayıt" gözəl nümunədir. Mükafatlar uğrunda mübarizə aparan komandalarla rəqabət apara biləcək komanda yaratmaq olar.
- "Kəpəz" ev oyunlarını"Dalğa Arena"da keçirsə, bu, azarkeş baxımından problemlərə səbəb olmayacaq?
- Bu, əlbəttə, problemlər yaradacaq. Hamıya məlumdur ki, bölgələrdə oyunlara paytaxtla müayisədə daha çox azarkeş gəlir. Ümid edirəm ki, Gəncədəki stadionda da hər şey tezliklə qaydasına düşəcək və biz ev oyunlarımızı doğma arenada keçirəcəyik. Gəncədə bizə ciddi dəstək olacaq.
