Asif Məmmədov: Futbolçunu pulsuz oynamağa məcbur etmək olmaz
"İnter"in yarımmüdafiəçisi Asif Məmmədovun azerisport.az saytına müsahibəsi
- "Qəbələ" ilə heç-heçəyə dair nə deyə bilərsiniz?
- Qəbələyə qələbə üçün gəlmişdik. Qalib gələcəyimiz halda çempionluq şansımızı saxlamış olacaqdıq. Amma görünür bu mövsüm qızıl medallar bizə qismət deyilmiş. "Qarabağ"ı çempionluq münasibəti ilə təbrik edirəm. Biz isə artıq növbəti mövsümdə uğur qazanmaq haqda düşünməliyik.
- "Qarabağ"ın çempionluğunu layiqli hesab edirsiniz?
- Bəli. Hazırda onlar ölkənin ən yaxşısıdırlar.
- Bəs sizin komandaya bu uğura nail olmaq üçün nə çatmadı?
- Hardasa maliyyə problemləri öz sözünü dedi. Amma hər şeyi bununla bağlamaq istəməzdim. Çətinliklərə baxmayaraq, uşaqlarla qərara gəldik ki, hər şeyə rəğmən, öz xoşbəxtliyimizi axtaraq. Sadəcə, alınmadı.
- Bundan sonra necə olacaq?
- Premyer Liqanın ikinci komandası olduq. Avropa Liqasında çıxış edəcəyik. Hazırlaşmaq lazımdır. Ümid edirəm ki, tezliklə klubumuzdakı problemlər tezliklə yoluna qoyulacaq.
- Bəs vəziyyət düzəlməsə?
- O zaman Avropa Liqasında işimiz asan olmayacaq. Həm də iddiasız komandada qalmağı hər futbolçu istəmir. Futbolçunu pulsuz oynamağa məcbur etmək olmaz.
- Bəs siz nə etməyi düşünürsünüz?
- Mən gözləmə mövqeyi tutmuşam. Başqa klublardan da təkliflər var. Amma "İnter"də hər şeyin necə nəticələnəcəyini gözləyirəm. Düzünü desəm, heç bir yerə getmək istəmirəm. Çünki bu klub mənim üçün doğmalaşıb. Ümid edirəm ki, sonda elə komandada qalacağam.
