Rəşad Sadıqov: Qarabağ qızıl dubla imza atmaq istəyir
"Qarabağ"ın kapitanı Rəşad Sadıqov Topaz Premyer Liqasının 34-cü turu çərçivəsində "Sumqayıt" üzərindəki qələbədən və növbəti çempionluqdan danışıb. Azerisport.az saytına açıqlamasında o, öncə bunları söyləyib:
"Öz oyunumuzla yanaşı "Qəbələ" və "İnter" arasındakı görüşdə baş verənləri də izləyirdik. Çünki həmin görüşün nəticəsindən çox şey asılı idi. Qəbələdə hər iki komanda çox yaxşı futbol sərgilədi. Amma təbii ki, heç-heçə bizim xeyimizə oldu".
Sadıqovun sözlərinə görə, komandası çempionluğun taleyini "İnter"lə növbəti turun oyununa saxlamaq istəmirmiş: "Hər şeyi növbəti tura saxlasaydıq, bizim üçün ağır nəticələnə bilərdi. Bu il ağır oyunlarımız çox oldu. Amma sonadək mübarizə apardıq. Bu oyunda da qələbə qazanmaq çox vacib idi. Çünki çempionluğu məhz bu tur təmin etmək istəyirdik".
Ağdamlıların kapitanı bu mövsüm qazanılan çempionluğun daha çətin əldə olunduğunu bəyan edib: "Bu mövsüm çox qələbə qazandıq. Amma gələcəyə baxmaq lazımdır. Keçirdiyimiz oyunları analiz etməliyik, nəticələr çıxarmalıyıq. Sadəcə onu deyə bilərəm ki, bu çempionluq ötən ilki ilə müqayisədə daha çətin başa gəldi"
"Bu mövsüm hər bir rəqibimiz bizimlə oyunlara xüsusi hazırlaşırdı. Azarkeşlər isə bizdən ardıcıl ikinci çempionluğu tələb edirdilər. Biz də hər oyunda qələbə qazanmağa çalışdıq. Hərdən bu, alınırdısa, alınmadığı oyunlar da olurdu. Son turlardakı xal itkiləri isə üzərimizdəki təzyiqi artırmışdı".
Sadıqov Azərbaycan Kubokunun finalında "Neftçi"yə qarşı keçirəcəkləri oyundan da danışıb: "Artıq "Neftçi" ilə kubokun finalındakı oyunumuzu düşünə bilərik. "Qızıl dubl"a imza atmaq istəyirik. Amma buna nail olmaq çox çətin olacaq. Çünki rəqib də mövsümü titulla başa vurmaq istəyir".
