Elvin Bədəlov: Neftçi bu baxımdan ideal variantdır

"Neftçi"nin müdafiəçisi Elvin Bədəlovun azerisport.az saytına müsahibəsi

- Mövsümün sonu çatır, amma siz hələ də "Neftçi"nin heyətində yer almırsınız. Növbəti mövsümdə də komandada qalmağı planlaşdırırsınız?
- Mənim hələ "Neftçi" ilə müqaviləm var.

- Sizinlə başqa maraqlanan yoxdur?
- Maraqlanırlar, sadəcə, "Neftçi"yə məxsusam.

- Rusiyaya qayıtmağınızı gözləmək olar?
- Əlbəttə, istərdim ki, Rusiyanın güclü komandalarından birində çıxış edim. Amma bunun üçün təcrübə toplamalıyam. "Neftçi" də bu baxımdan ideal variantdır.

- Niyə heyətə düşə bilmirsiniz?
- Bu suala cavab verə bilmərəm. Çünki heyəti məşqçilər müəyyənləşdirir. Yaxşı olardı ki, bunu Arif Əsədovdan soruşasınız. Əsas heyətə düşmək üçün əlimdən gələni edirəm. Ümid edirəm ki, tezliklə mən də forma şansı qazanacağam.

- Başqa klubda icarədə oynamağı arzulamırsınız?
- Xeyr, "Neftçi"dən getmək istəmirəm. Hətta icarədə oynamağı da düşünmürəm.

- Əsas rəqiblərinizdən olan Elvin Yunuszadənin transferə çıxarılması sizin yolunuzu aça bilər?
- Elvin əla insan, əla oyunçudur. Ona çox böyük hörmətim var. O, əsas heyətdə oynamağa layiq idi. Amma onun barəsində əvəzedici komandaya göndərilmək qərarını mən çıxarmamışam. İstənilən halda mənə şans veriləcəyinə ümidliyəm. Hər şey baş məşqçidən asılıdır.

- "Zenit"dən də sizinlə maraqlanan yoxdur?
- Düzünü deyim ki, yox. Bəzi uşaqlarla zəngləşirəm. Onların dediyinə görə həmin vaxt baş məşqçi olan Dmitri Çerışev məni buraxmasına görə təəssüflənirmiş. Amma mən öz seçimimi etmişdim.

- O, hazırda "İrtış"da çalışır...
- Hə, ona uğurlar arzulayıram. Çox yaxşı insan, çox yaxşı mütəxəssisdir.

- Ramil Şeydayevlə əlaqə saxlayırsınız?
- Bəli, hərdən. Şadam ki, o, "Zenit"in əsas heyətində çıxış edir. Ümid edirəm ki, daha yaxşı olacaq.

- O, təsadüfən sizə Azərbaycan yığmasında oynamaq istəyindən danışmayıb?
- Xeyr, biz onunla futboldan danışmamağa çalışırıq.