Aleksandr Amisulaşvili: İnter çempion olsa, bu, möcüzə olacaq

"İnter"in müdafiəçisi Aleksandr Amisulaşvilinin azerisport.az saytına müsahibəsi

- Bir neçə tur öncə hətta komanda yoldaşlarınızın da bəzisi "Qarabağ"ı çempionluq münasibətilə təbrik etdiyi halda, indi vəziyyət dəyişib və qarşıdakı üç oyunda qələbə qazanmaqla böyük sürprizə imza ata bilərsiniz...
- Sözdə hər şey çox xoş görünür. Amma buna nail olmaq çox çətin olacaq. Hər şey o dərəcədə asan deyil. Məsələn, "Qəbələ" ilə oyunu götürək. Səfərdə onlara qalib gəlmək çox çətin olur. Üstəlik, "Qarabağ" və "Sumqayıt"la da oyunlarımız qalır. Amma fikrimcə, bu hədəfə nail olmaq da mümkündür.

- "Qəbələ" ilə səfər oyununu qalan görüşlər arasında ən çətini saymaq olar?
- Hər üç rəqib sıradan komanda sayıla bilməz. "Qəbələ" isə böyük bir məğlubiyyətsizlik seriyasına malikdir.

- Maliyyə probleminə görə komandada atmosfer pis deyil?
- Xeyr, sadəcə, mən məşqdən sonra bir qədər yorğun olduğuma görə beləyəm (gülür).

- Klubun üzləşdiyi çətinlik sizə təsir etmir?
- Əlbəttə, bu, xoş hadisə deyil ki, maaşını vaxtında ala bilmirsən. Amma nə etmək olar ki? Bizim iki variantımız var: ya çıxıb oynamaq, ya da bundan imtina etmək.

- İkinci variant mümkündür?
- Biz elə etməyəcəyik. Üç tur qalıb, sonadək mübarizə aparmaq lazımdır. Mövsümü layiqli şəkildə başa vurmalıyıq.

- Klubla müqavilənizin müddəti mövsümün sonunda başa çatır. Sizin addımınız necə olacaq?
- Böyük ehtimalla klubu tərk edəcəyəm. Hara gedəcəyimi, nə edəcəyimi hələlik dəqiq deyə bilmərəm. Zaman göstərəcək.

- Bu mövsüm "İnter" çempion olsa, bunu möcüzə saymaq olar?
- Böyük ehtimalla, hə. Xüsusilə də uşaqların maaş almadan bu cür oynadığını qeyd etmək istərdim. Mən belə bir hadisənin heç yerdə şahidi olmamışdım.