Jorje Andrade: Amit Quluzadə Atletiko üçün önəmli futbolçudur
Portuqaliya yığmasının sabiq futbolçusu, Lissabonun "Atletiko" klubunun məşqçisi Jorje Andrade Azərbaycan yığmasının sabiq yarımmüdafiəçisi Amit Quluzadə ilə bağlı fikirlərini açıqlayıb. Azerisport.az saytına açıqlamasında o, bunları söyləyib:
"Komandamızda legionerlərin də olması müəyyən mənada yaxşıdır. Amit və digər legioner futbolçular "Atletiko" üçün önəmlidir. Onun əla texnikası var və mərkəz yarımmüdafiəçisi kimi özünü yaxşı tərəfdən göstərməyi bacarır. Onun müasir ötürmələri komandamız üçün çox vacibdir. Amma Portuqaliyada çempionat çox çətindir. Bu üzdən də belə oyunçuların olması bizim ancaq xeyrimizədir".
O, Quluzadənin Portuqaliyadakı perspektivi barədə də danışıb: "Portuqaliya Super Liqasında çıxış edən "Benfika", "Sportinq", "Portu", "Boavişta" və "Braqa" kimi klublar daim ikinci liqadakı futbolçularla maraqlanırlar. Məsələn, Amit kimi futbolçular "Portu", "Benfika" kimi yerli klublara çox maraqlıdır. İndi o, doğru yoldadır. Əlbəttə, Amitə yerli futbola tam uyğunlaşmaq üçün bir qədər də vaxt lazımdır. Bu, onun üçün problem olmamalıdır. Hesab edirəm ki, böyük klublar tezliklə ona maraq göstərəcəklər".
