Nazim Süleymanov: İlk matçın Bakıda keçirilməsini istərdim

Azərbaycanın U-19 yığmasının baş məşqçisi Nazim Süleymanovun azerisport.az saytına müsahibəsi

- Azərbaycan veteranları ilə Vladiqafqaz "Alaniya"sı arasında keçiriləcək yoldaşlıq görüşünə hazırlıq necə gedir?
- Rusiyadakı bayram tədbirləri bitəndən sonra Vladiqafqazdakı dostlarıma zəng edib, hər şeyi dəqiqləşdirəcəyəm. Qarşılaşma təxminən mayın 24-də keçiriləcək. Komandaların heyəti demək olar ki, məlumdur. Düzünü desəm, mən ilk oyunun Bakıda keçirilməsini istərdim. Amma bizi ilk oyunu orada keçirməyə dəvət etdilər.

- Hazırda siz özünüz hansı təşkilatı məsələlərlə məşğulsunuz?
- Bütün bu işləri oyuna ev sahibliyi edəcək tərəf öz üzərinə götürüb. Bizə sadəcə, ora vaxtında getmək lazımdır.

- Bəs cavab görüşü nə vaxt olacaq?
- İlk oyundan sonra aydınlaşdıracağıq. Amma həmin matç Avropa Oyunlarından sonraya təsadüf edəcək.

- Azərbaycanın U-19 yığmasındakı işləriniz necə gedir?
- Mənim üçün hər şey yeni olsa da, öhdəsindən gəlməyə çalışıram. Fikrimcə, bu, böyük məsuliyyətdir. Həm də seçmə mərhələ oyunları noyabrda Bakıda olacaq.

- Türkiyə, Ukrayna, Bosniya və Herseqovina kimi rəqiblərlə qarşılaşacaqsınız...
- Asan olmayacaq. Hətta evdə oynamağımıza baxmayaraq, çətin olacağını bilirik. Çətin rəqiblərdir. Hər biri futbol ölkəsi hesab olunur. Amma istənilən halda uğurlu çıxış etməyə çalışacağıq. Xaricdə təlim-məşq toplanışı keçmək istəyimiz var. AFFA komanda üçün hər cür şərait yaradır. Mayın sonunda bir araya gəlməyi düşünürük.

- Bəs köməkçiləriniz kimlər olacaq?
- Bu məsələ hələlik, müzakirə mərhələsindədir. Hələ qərar verməmişik. Mayın sonuna qədər bu məsələ həllini tapmalıdır.

- Köməkçilərinizi özünüz seçəcəksiniz?
- Namizədlərin siyahısı məndə olacaq və son seçimi özüm edəcəyəm. Çünki onlarla mən işləməli olacağam.