Rəşad Sadiqov: Mövsümü medalsız başa vurmaq üzücü olar

"Qəbələ"nin yarımmüdafiəçisi Rəşad Sadiqovun azerisport.az saytına müsahibəsi

- "Sumqayıt"la oyun barədə nə deyə bilərsiniz?
- Çətin oyun olacağını başa düşürdük. Rəqib gənclərdən qurulmuş komandadır, bir yerdə dayanmırlar, çox hərəkət edirlər. Amma biz formada olduğumuzu göstərdik. Artıq 10 oyundur uduzmuruq. Deməli, burada bəxtdən söhbət gedə bilməz.

- Rəqibi yaxşı analiz etmişdiniz?
- Bəli, ümumiyyətlə, Roman Qriqorçuk rəqibləri analiz etməyə çox vaxt sərf edir. Biz isə meydanda onun tapşırıqlarını yerinə yetirməyə çalışırıq. Rəqibə oynamağa imkan vermirik. Həm də biz rəqiblər arasında fərq qoymuruq, liderə də, autsayderə də eyni qaydada mübarizə aparırıq.

- Son dövrlər ilk dəfə start heyətdə yer almışdınız...
- Bir müddət zədəli oldum, sonradan bərpa dövrü keçdim. Hamıya məlumdur ki, qalib heyəti dəyişmirlər. Komandamız uğurlu seriyaya da mən oynamadığım dövrdən başlayıb. Amma sağ olsun Qriqorçuk, mənə də şans verir.

- Komandanızın bürünc medal uğrunda mübarizədə favorit saymaq olar?
- Bürünc medalı qazanmaq üçün əlimizdən gələni edəcəyik. Mövsümü medalsız başa vurmaq üzücü olar.

- Müqavilə müddətini artırmaqla bağlı rəhbərliklə söhbətiniz olub?
- Hələ yox.

- Yığmamızın Serbiya və Norveçlə oyununa dəvət alacağınızı gözləyirsiniz?
- Robert Prosineçki məni Antalya toplanışına dəvət etmişdi. Amma zədə səbəbindən orada oynaya bimədim. Fikrimcə, bu dəfə də dəvət göndərəcək.