Mehman Allahverdiyev: Kəpəzin Premyer Liqada maliyyə probleminin olacağını düşünmürəm

"Kəpəz"in prezidenti Mehman Allahverdiyev komandasının Premyer Liqaya vəsiqə qazanmaq perspektivindən danışıb. Azerisport.az saytına açıqlamasında o, bunları söyləyib:

"Gəncə həmişə futbol şəhəri olub, futbolla nəfəs alıb. İki ildir birinci divizionda oynayırıq, indi isə Premyer Liqaya qayıdırıq. Rövnəq Abdullayev sağ olsun ki, Gəncədə futbolu saxladı. Ona çox minnətdarıq. Allah eləsin ki, "Kəpəz" yenidən Premyer Liqada xüsusi pay sahibi olsun. Digər regionlarımızın da elitada təmsil olunmasını istərdim. İnanmıram ki, Premyer Liqada maliyyə problemimiz olsun. İlk növbədə AFFA-dan kömək etmələrini xahiş edəcəyik. İki potensial sponsorla danışıqlarımızı davam etdiririk".

Allahverdiyev bəyan edib ki, komanda ev oyunlarını öncə "Dalğa Arena"da keçirəcək: "Bir müddət ev oyunlarımızı "Dalğa Arena"da keçirəcəyik. Bizim Gəncə şəhər stadionunda müəyyən işlər görməyimiz lazımdır. Ondan sonra stadion ev oyunlarımızı keçirməyə hazır olacaq".