Elvin Məmmədov: İnterdə hər kəs sensasiya edəcəyimizə inanır
"İnter"in yarımmüdafiəçisi Elvin Məmmədovun azerisport.az saytına müsahibəsi
- "Neftçi" ilə oyun barədə nə deyə bilərsiniz?
- Gözəl oyun alındı. Komandamı və özümü qələbə, vurulan qollar münasibətilə təbrik edirəm. "Qarabağ"la xal fərqini azaltmağa nail olduq. Hələ ki, hədəfə doğru irəliləyirik.
- Nəticənin bu dərəcədə gözəl olacağını gözləyirdiniz?
- Xeyr. Amma biz yaxşı futbol sərgilədik. Heç kim deyə bilməz ki, nəticə oyuna görə olmadı.
- Mirhüseyn Seyidov sizin ayağınıza zərbə endirdiyinə görə meydandan qovuldu. Sizcə, orada qırmızı vərəqə var idi?
- Oyun epizodu idi. Həmin epizod mənə qəsdən edilmiş hərəkət kimi görünmədi. Amma hakim elə qərar çıxardı.
- Siz qol vuranda topu Aqil Məmmədovun ayaqları arasından tora göndərmək fikrində idiniz?
- (gülür) Elə fikrim var idi, amma alınmadı.
- "İnter" qalan bütün oyunlardan qalib ayrılsa, "qızıl oyun" olacaq?
- Komanda sensasiya edə biləcəyinə inanır. Biz öz şansımızı itirməmişik. Növbəti turda bizi "Qəbələ" ilə çətin oyun gözləyir. Onlara da qalib gəlsək, gözəl şans yaxalamış olacağıq.
- Bu inam sizdə haradandır? Axı adətən maliyyə problemləri olan klublarda tam fərqli motivasiyanın şahidi olmaq mümkündür...
- Düzünü desəm, biz də xoşagəlməz vəziyyətlə üzləşmişik. Amma buna baxmayaraq, hədəfimizə çatmağa çalışırıq. İkinci yerdə gedən komandanın maliyyə problemi ilə üzləşməsi çox üzücüdür. Ümid edirəm ki, hər şey düzələcək. Çünki biz Azərbaycanı Avropada təmsil etməliyik.
- "Neftçi" ilə danışıqlar apardığınız barədə xəbərlər nə dərəcədə doğrudur?
- Bu xəbərlər həqiqəti əks etdirmir. Şəxsən mən özüm belə bir söhbət eşitməmişəm.
- Sizə elə gəlmir ki, bu oyundan sonra "Neftçi" rəhbərliyi təklif göndərə bilər?
- Bu, artıq "Neftçi" rəhbərliyindən asılıdır. Mən bunu şərh edə bilmərəm.
- "İnter"in yayda büdcəni azaltması gözlənilir. Maaşınızın azaldılmasına razı olacaqsınız?
- Məbləğ məni qane edəcəksə, niyə də yox?
