Erik Ramos: Bundan sonra Neftçinin üçüncü pilləyə qalxması da çətin olacaq

"Neftçi"nin yarımmüdafiəçisi Erik Ramosun azerisport.az saytına müsahibəsi

- "İnter"lə oyun barədə nə deyə bilərsiniz?
- Birinci hissədə yaxşı oyun sərgilədik. İkinci hissədə isə hər şey fərqli alındı. Bizim oyunumuz qətiyyən alınmadı.

- Nə dəyişdi ki?
- Rəqibin ikinci qolu bizi "sındırdı". Əsəbi görünürdük. Oyunumuzda təşkilatçılıq yox idi. "İnter" isə bizim zəif cəhətlərimizdən yararlandı. Onların dörd qol epizodu oldu, hamısından da istifadə etdilər.

- Buraxdığınız ilk qoldan sonra hakimi alqışlamağınız nə ilə bağlı idi?
- Top qapı qarşısına ötürülərkən hakimin fitinin səsini eşitdik. Bu, bizi yanıltdı.

- Son turlarda qırmızı vərəqələrin sayı artıb. Julius Vobay əvəzlənərkən heç kimin əlini sıxmadı. Sizə elə gəlmir ki, komandada intizama əməl olunmur?
- Nəticələr komandada gərginliyə səbəb olur. Bu, uşaqlar arasında əsəbləri artırır. Bu, normaldır.

- Bəlkə bütün bunlar fiziki hazırlığın qaydasında olmamasından irəli gəlir?
- Başqalarını deyə bilmərəm. Amma özümlə bağlı onu deyə bilərəm ki, bəzən rəqiblərə qarşı mübarizə apararkən kobudluğa əl atmaq məcburiyyətində qalıram.

- "Neftçi" üçün çempionat başa çatıb?
- Əlbəttə, çempionat artıq bizim üçün bitib. Bundan sonra bizim hətta üçüncü pilləyə qalxmağımız da çətin olacaq.