Robert Prosineçki: Neftçi ilə bağlı suallara cavab verməkdən yorulmuşam
Azərbaycan yığmasının baş məşqçisi Robert Prosineçkinin azerisport.az saytına müsahibəsi
- Çempionatın hər turunu izləyirsiniz. Maraqlı nəsə yenilik var?
- Nə deyəcəyimi belə bilmirəm. Maraqlı heç nə yoxdur. Hər şey əvvəlki kimidir.
- Bir müddət öncə sizin "Neftçi"nin baş məşqçisi Arif Əsədovla və klubun idman direktoru Vəli Qasımovla görüşünüz oldu. Əsədov hətta sizin komandanın məşqini izləməyə dəvət etmişdi. Klubun bazasına baş çəkdiniz?
- Klubların məşq prosesini izləməyi qarşıma hədəf qoymamışam. Bu, mənim işim deyil. Biz həmin görüşdə belə nəticəyə gəldik ki, "Neftçi"nin futbolçuları yığmada oynamq isrəyirlərsə, klubda daha yaxşı çıxış etməli, daha yaxşı formada olmalıdırlar.
- "Neftçi"nin yığmada təmsil olunmamasından bu cür narahatlığına sizin münasibətiniz necədir?
- "Neftçi" barədə çox sual verilir. Mən artıq bu mövzuda suallara cavab verməkdən yorulmuşam. Onların həyəcanını baaş düşürəm. Çünki bu klub Azərbaycan futbolunun flaqmanı hesab olunur. Amma gəlin bu mövzunu bağlayaq. Araz Abdullayev formada olsa, mən onu yığmaya dəvət edəcəym. Lakin Rauf Əliyev klubunda oynamırsa, onu necə milliyə çağırmağımı tələb edə bilərsiniz? Kim formadadırsa, o da yığmaya çağırılacaq.
- Andrey Popoviç "Sumqayıt"ın əvəzedici komandasına göndərilib. Onun bu dəfə milliyə dəvət almaq şansı var?
- Şübhəsiz ki, belə olan halda o, yığmaya dəvət almayacaq. Öz klubunun məşqlərinə qatılmayan futbolçu yığmada yer ala bilməz. Malta ilə oyun ərəfəsində o, hər tur meydana çıxırdı. Ona görə də milliyə dəvət olunmağı haqq edirdi. Amma bu dəfə elə deyil. O, oynamır və klubunun intizam qaydalarına əməl etmir. Nəticədə də yığmaya çağırılması mümkünsüzdür.
- İyunun 3-də Azərbaycan Kubokunun final oyunu keçiriləcək. Amma yığmamız finalda iştirak edəcək oyunçular olmadan Avstriyaya yola düşəcək...
- Bu proqramı çoxdan müəyyənləşdirmişik. Heç nəyi dəyişmək olmaz. Bu formada hazırlaşmalıyıq.
- Norveçlə seçmə mərhələ oyunu öncəsi Serbiya yığması ilə yoxlama oyunu sizin üçün nə dərəcədə önəmlidir?
- Mən bu rəqibi xüsusi olaraq seçmişəm. Əlbəttə, indi bu komanda heç də yaxşı günlərini yaşamır. Amma futbolçularının səviyyəsini nəzərə almaq lazımdır. Serbiyalı oyunçular Avropanın bir sıra aparıcı klublarında çıxış edirlər. Bizi yaxşı sınaq görüşü gözləyir. Belə oyunların sayı daha çox olmalıdır.
