Rauf Əliyev: İndidən finalı düşünməyimiz düzgün deyil

Azərbaycan yığmasının və "Neftçi"nin hücumçusu Rauf Əliyevin azerisport.az saytına müsahibəsi

- "İnter"lə oyundan nə gözləyirsiniz?
- Hədəfimiz qələbə qazanmaqdır. Başqa nəticə barədə düşünməyə də dəyməz. Bu görüş bizim üçüncü yeri tutmağımız baxımından çox vacibdir. Meydana yalnız 3 xal üçün çıxacağıq.

- "Neftçi" mükafatçılar sırasına düşə bilməsə, bu, uğursuzluq sayılacaq?
- Biz bu barədə düşünmürük. Medallara ümidliyik.

- Komandanız bu mövsüm Premyer Liqa çərçivəsində "İnter"ə qalib gələ bilməyib. Bu, sizi narahat etmir?
- Xeyr. Çünki biz bu komandanı kubokda mübarizədən kənarlaşdırmışdıq. Eyni uğura çempionatda da nail ola bilərik.

- Əvvəllər sizin baş məşqçi Arif Əsədovla probleminizin olduğu bildirilirdi...
- Mənim baş məşqçi ilə problemim olmayıb, indi də yoxdur. Sadəcə, zədəm var idi, sonradan xəstə oldum. Bir növ qara zolağa düşmüşdüm. Allah eləsin ki, bütün bunlar geridə qalsın.

- Mövsümün sonunda "Neftçi"də qalacaqsınız?
- Bəli, mənim klubla daha bir illik müqaviləm var. Komandamızın əvvəlki mövqeyini geri qaytarmasına kömək etmək istəyirəm.

- Kubokun finalı barədə düşünməyə başlamısınız?
- Ona hələ çox var. İndidən bu oyunu düşünməyimiz düzgün deyil. Qarşıda hələ çempionat oyunlarımız var.

- Sizi yığmamızın Serbiya və Norveçlə oyunlarında görə biləcəyik?
- Yığmamıza uğurlar arzulayıram.

- Yəni heyətdə yer almayacağınızı gözə almısınız?
- Yığmada oynamaq istənilən futbolçunun arzusudur. Mən də "Neftçi"dəki oyunumla əvvəlki formamı geri qaytardığımı isbatlamağa çalışacağam. Qalanı isə baş məşqçidən asılıdır. Robert Prosineçi mənə dəvət göndərməsə də, bu, dünyanın sonu olmayacaq.