Anton Krivotçuk: Azərbaycanın iddialı klublarından birində oynamaq istəyirəm

Azərbaycan yığmasının müdafiəçisi Anton Krivotçukun azerisport.az saytına müsahibəsi

- Yenə də "Zvezda"da çıxış edirsiniz?
- Bəli, Ukraynada 17 yaşadək futbolçuların çempionatında çıxış edirəm. Hələ Kiyev çempionatı da var. İşlər pis getmir.

- Yığma komandamızın seçmə mərhələdəki uğursuz çıxışına nə səbəb oldu?
- Səbəb tapmaq çətindir. Yaxşı komandamız var. Bu üzdən niyə uğursuzluqla üzləşdiyimizin səbəbi mənə də qaranlıqdır. Yəqin ki, yaxşı hazırlaşa bilməmişdik.

- Komandanın yeni baş məşqçisi Təbriz Həsənovla tanışlığınız var?
- Şəxsən yox. Amma onunla çalışmaq mənə xoş olardı.

- Baş məşqçi Robert Prosineçki sizə dəvət göndərmişdi. Ondan yenə dəvət gözləyirsiniz?
- Hələ öz üzərimdə çox çalışmalıyam. Əminəm ki, çox çalışsam, dəvət alacağam. Prosineçki məni Antalyaya dəvət etsə, çox sevinərəm.

- Kayreranızı Azərbaycanda davam etdirə biləcəyinizi demişdiniz...
- Bəli, təkliflər var idi. Azərbaycanın bir neçə komandası məni heyətində görmək istəyirdi. Amma bu işlərlə menecerim məşğul olur. O, bu işin incəliklərini daha yaxşı bilir. Təbii ki, mən də iddialı komandalardan birində oynamaq istərdim.

- Prosineçki toplanışdan sonra sizinlə danışıb?
- Xeyr, aramızda heç bir söhbət olmayıb.

- Valideynləriniz Azərbaycan yığmasında oynamağınıza necə baxır?
- Onlar məni dəstəkləyirlər və istəyirlər ki, bu ölkənin yığmasında oynayım.

- Ukrayna yığmasından təklif almamısınız?
- Xeyr.