Rəşad Eyyubov: Simurqu belə buraxıb gedə bilmərəm

"Simurq"un yarımmüdafiəçisi Rəşad Eyyubovun azerisport.az saytına müsahibəsi

- Son dövrlər sizinlə Samir Zərgərovun "Qəbələ"yə keçəcəyi barədə xəbərlər yayılıb...
- Mənimlə bağlı xəbərlər əsassız deyil. Amma konkret bir şey yoxdur. Daha dəqiq desəm, danışıqları mən yox, bununla məşğul olan şəxs aparır. Onu da nəzərə almaq lazımdır ki, mənim "Simurq"la müqaviləmin vaxtı 2016-cı ilin yayında başa çatacaq.

- Amma klubunuzdan deyiblər ki, pul yoxdur və istəyən gedə bilər...
- Mən bu klubda dörd il keçirmişəm. İndi bundan sonra nə olacağını bilmək istəyirəm. Dərhal əşyalarımı toplayıb, buradan gedə bilmərəm. Mənim üçün klub prezidenti Anar Bəkirovla görüşüb, onun gələcək planlarını öyrənmək vacibdir.

- Hər halda daha iddialı klubda oynamağın əleyhinə olmazsınız...
- Əlbəttə, bunu mən də istəyərəm.

- "Simurq" avrokuboklara da vəsiqə qazana bilmədi...
- "Simurq"un Avropa Liqasına vəsiqə qazana bilməməsi üzücü oldu. Bu da məhz maliyyə problemləri ucbatından oldu. "Qəbələ"nin Avroliqaya vəsiqə qazanması isə futbolumuz adına yaxşıdır.

- "Qəbələ" sizi heyətinə qatmaqda nə dərəcədə israrlıdır?
- (gülür) Bunu zaman göstərəcək. Əgər hələ də məni öz sıralarında görmək istəyirlərsə, deməli, israrlıdırlar.

- Artıq klubun demək olar ki, bütün legionerləri "Simurq"u tərk edib...
- Mən legionerlər kimi addım ata bilmərəm. Mövsümün sonunadək buradayam. Burada süpürgəçidən tutmuş qazona nəzarət edənədək hər kəsi tanıyıram. Vəziyyətin bu həddə çatması çox üzücüdür. Amma mən də öz ailəmi, kayreramı düşünməyə borcluyam.

- Mövsümün sonunadək pulsuz oynamaq çətin olmayacaq?
- Əlbəttə, motivasiya tapmaq çətin olacaq. Nə etmək olar ki? Peşəkar qalmaq lazımdır.