Rikardinyo: Maliyyə çətinliklərindən heç bir klub sığortalanmayıb
"Qəbələ"nin müdafiəçisi Rikardinyonun azerisport.az saytına müsahibəsi
- 9 oyunluq məğlubiyyətsiz seriya ilə bağlı nə deyə bilərsiniz?
- Buna normal baxıram. Yaxşı komandamız var, məşqlərdə çox çalışırıq. Yaxşı oyunlar keçirib, nəticədə də müsbət sonuca nail oluruq. Amma hələ də çatışmayan cəhətlərimiz var. Məsələn, çoxlu səhvlər buraxırıq.
- Müsbət nəticələr elə sizin gəldiyiniz dövrdən etibarən başlayıb. Bu, təsadüfdür, yoxsa siz doğrudan da "Qəbələ"ni gücləndirmisiniz?
- Əlbəttə, bu, təsadüfdür. Amma heyəti gücləndirə bilmişəmsə, buna da ancaq sevinmək olar. Futbol komanda oyunudur. "Qəbələ"nin oyununu ilk dəfə "Neftçi" ilə görüşdə görmüşdüm. Məndən öncə də komanda yaxşı oynayırmış. Amma nəticələrin niyə pis olduğunu dəqiq bilmirəm. Ola bilsin ki, buna qışda çoxlu dəyişiklik olması təsir göstərirmiş.
- Premyer Liqanın səviyyəsi xoşunuza gəlir?
- Yaxşıdır. Güclü oyunçular, yaxşı meydançalar və heç də pis olmayan azarkeşlər var. Amma bu, hələ son hədd deyil. Daha da inkişaf etmək olar.
- "Neftçi" ilə üçüncü yer uğrunda mübarizə barədə nə düşünürsünüz?
- Əsas vəzifə Avropa Liqasına vəsiqə idi ki, bunun öhdəsindən gəlmişik. Halbuki, tur öncə bizə çox az adam inanardı. Bürünc medallara gəlincə, komandamız bunu da əldə edə bilər. Fikrimcə, üçüncülüyü qazana bilsək, bu, Avroliqa öncəsi bizə əlavə ruh yüksəkliyi qazandıracaq.
- Qarşıda "Sumqayıt"la oyun var...
- Onlar son turlarda yaxşı çıxış edirlər. Amma biz ümumi uğurumuz naminə bu görüşdə də qələbə qazanmalıyıq. Azərbaycan çempionatında rəqibin neçənci pillədə qərarlaşmasının fərqi yoxdur.
- "Qəbələ" Avroliqada nəyə nail ola bilər?
- Biz uzağa gedə bilərik. Komandanın səviyyəsi yüksək hədəflərə nail olmağa imkan verir. Amma bu səviyyəni daha da yaxşılaşdırmaq lazımdır. Avropada işimiz Premyer Liqadakından daha çətin olacaq.
- Az qala Premyer Liqanın iştirakçılarının yarısı maliyyə problemlərindən əziyyət çəkir. Bunun "Qəbələ"də də təkrarlanacağından qorxmursunuz?
- Azərbaycan futbolunda yenilərdənəm. Ona görə də belə bir halın yaşanacağını təsəvvür etmirəm. Düzünü deyim ki, klub rəhbərləri haqqında heç bir təsəvvürüm yoxdur. Amma asan olmadığını bilirəm. Eyni aqibətlə bütün klublar üzləşə bilər. Heç kim bundan sığortalanmayıb. Amma ümid edirəm ki, maliyyə çətinliyi üzləşən klublar nəsə edib, vəziyyəti düzəldəcəklər. Onlara uğurlar arzulayıram.
