Deni Qaysumov: AFFA-da çalışan dostlarım mənə işlə bağlı kömək edəcəklərinə söz vermişdilər
Azərbaycan milli komandasının sabiq oyunçusu Deni Qaysumovun azerisport.az saytına müsahibəsi
- Çoxdandır işsizsiniz. Yenə işsiz günlər davam edir?
- Hələ ki, işləmirəm. Sadəcə, bir komanda ilə məşğulam. Çeçenistanda Respublika çempionatında çıxış edir. Beş turdan sonra liderik.
- Azərbaycandan təklif var?
- Yox, hələ ki, Bakıdan təklif gəlməyib.
- Yəqin ki, Azərbaycan futbolu ilə maraqlanırsınız? Son vaxtlar bizim futbolda baş verənlər haqda nə düşünürsünüz?
- İzləməyə çalışıram. Əsasən də portalları oxuyuram. Malta üzərindəki qələbəyə görə çox sevindim. Yeni baş məşqçi də gəlib. Bu dəyişiklikdən sonra adam millidən daha çox qələbə və baxımlı oyun gözləmək istəyir.
- Çempionatımzın səviyyəsinin düşdüyü bildirilir. Siz də bu cür düşünürsünüz?
- Xeyr, mən tam əksini düşünürəm. Məncə, Azərbaycan Premyer Liqası ötən illərdəkindən fərqli daha da güclənib. Buna misal “Qarabağ”dır. Bu klub Avropa Liqasının qrup mərhələsində güclü çıxış etdi. Bu da Azərbaycan Premyer Liqasının güclənməsindən xəbər verir.
- Çempionat 9 komanda ilə davam edir. “Xəzər Lənkəran” və “Bakı” kimi əvvəlki illərdə çempionluq uğrunda mübarizə aparan klublar liqada qalmaq üçün mübarizə aparır. Çempionatın səviyyəsinin yüksəldiyini necə söyləmək olar?
- Böhran hər komandada olur. Ancaq Azərbaycan çempionatında çıxış edən çox komandalar Avropa Liqasının qrup mərhələsində mübarizə aparmağı istəyərdi. Unutmayaq ki, zəif komandalara hər çempionatda rast gəlmək olar.
- AFFA-da işləyən, millidə çalışan dostlarınız var. Onlar nə əcəb iş tapmaq üçün sizə kömək etmirlər?
- Əlbəttə, dostlarım var. Klubda və millidə işləyirlər. Ancaq hamısının özünün problemi var. AFFA-da da işləyən dostlarım var, onlar söz vermişdilər ki, variant olsa, mənə deyəcəklər. Amma hələ ki, qismət olmayıb.
- Düşünmürsünüz ki, Azərbaycanda işləməyə layiq insanlardan birisiniz? Uzun müddət millimizin formasını geyinmisiniz...
- Məmnuniyyətlə işləyərdim. Mənim də arzum budur ki, nə vaxtsa milli komandada işləyəm.
- Millidən tanıdığınız Nazim Süleymanov U-19-un baş məşqçisi, Vəli Qasımov isə “Neftçi”nin idman direktoru təyin edildi. Bu haqda məlumatınız var idi?
- Nazimin böyük təcrübəsi var və uşaqlara çox şey öyrədə bilər. Vəli də öz futbol bacarığını “Neftçi”də tətbiq etməyə çalışacaq. Hər ikisinin bu yerlərə layiq olduğunu düşünürəm. Həm Vəli, həm də Nazim çox böyük oyunçular olub. Onlara ürəkdən uğurlar arzulayıram.
