Andrey Popoviç: Bundan sonra hər yoxluğum içkili olmağımla izah olunacaq?
Azərbaycan yığmasının və "Sumqayıt"ın qapıçısı Andrey Popoviçin azerisport.az saytına müsahibəsi
- "Sumqayıt"ın məşqlərində niyə iştirak etmirsiniz?
- Düzünü deyim ki, ailə vəziyyətimlə əlaqədar bir neçə məşqi buraxmalı oldum. Elə alındı ki, xəbər də edə bilmədim. Klub prezidentinə hər şeyi izah etmişəm. Komandanı pis vəziyyətdə qoyduğumu anlayıram.
- Amma mətbuatda sizinlə bağlı başqa problem qabardılır. Guya siz içkili olmusunuz...
- Bu, düz deyil. Təəssüf ki, bu, mənimlə bağlı yazılan ilk belə xəbər deyil. Mən sadəcə, şokdayam. Bundan sonra hər yoxluğum içkili olmağımla izah olunacaq?
- İstənilən halda klub sizi cərimələyib və əvəzedici heyətə göndərib...
- Mənim bu cəzaya iradım yoxdur. Əgər məni əsas komandadan uzaqlaşdırıblarsa, formamı itirməmək üçün əvəzedici komandada oynamağım lazımdır.
- Mövsümün sonunda klubla müqavilənizin müddəti başa çatacaq. Amma siz bunu gözləmədən "Qəbələ" ilə danışıqlara başlamısınız. Danışıqlar necə gedir?
- Hələ davam edir. Nə vaxt razılığa gəlsək, klub bu barədə rəsmi məlumat yayacaq.
- Bəs buna indiki klubunuzun rəhbərliyi necə reaksiya verdi?
- "Sumqayıt"la müqavilənin müddətini uzatmaqla bağlı klub rəhbərliyi ilə görüşümüz olmuşdu. Amma eyni zamanda "Qəbələ" də mənimlə fəal şəkildə maraqlanırdı. Elə alındı ki...
- Elə alındı ki, "Qəbələ" daha sərfəli təklif irəli sürdü?
- Burada söhbət yalnız puldan getmir. Oyun təcrübəsi baxımından götürsək, "Sumqayıt"da mənim buna görə problemim olmurdu. Yığma komandaya da yolum açıq idi. "Sumqayıt"da hər şey xoşuma gəlirdi. Amma mənim artıq 23 yaşım var və daha iddialı klublarda oynamaq, inkişaf etmək istəyirəm. Amma əminəm ki, mənim "Qəbələ"yə pula görə qaçdığımı deyəcəklər. Təbii ki, bu, futbolçu üçün az əhəmiyyət daşımır. Lakin indiki məqamda bu, hər şey demək deyil.
- "Qəbələ"də oyun təcrübəsi qazana bilməyəcəyinizdən qorxmursunuz? Çünki Dmitri Bezotosnı bu komandanın əsas qapıçısına çevrilib...
- Mən rəqabətdən çəkinmirəm. Mən bu kluba mövsümün ortasında keçmirəm ki. Mənim özümü göstərmək, əsas heyətə layiq olduğumu isbatlamaq imkanım olacaq.
- Avrokuboklarda heç vaxt oynamamısınız. Yeni klubunuzun Avropa Liqasına vəsiqə qazanması seçiminizdə nə dərəcədə rol oynadı?
- Təbii ki, avrokuboklarda oynamaq perspektivi çox böyük önəm kəsb edirdi.
