Abdulla Abatsiyev: İnteri FİFA-ya şikayət etməyi heç ağlıma da gətirmirəm

"İnter"in yarımmüdafiəçisi Abdulla Abatsiyevin azerisport.az saytına müsahibəsi

- Bir oyun az keçirsəniz də, hazırda lider "Qarabağ"dan 12 xal geri qalırsınız. Çempionluğa ümidiniz qalır?
- Xal fərqi az olsa da, biz ötən mövsüm olduğu kimi, sonadək mübarizə aparacağıq. Ötən mövsüm biz liderlə oyunda uduzaraq şansımızı itirdik. Bu mövsüm isə bunun təkrarlanmasını istəmirik.

- Amma hamı artıq "Qarabağ"ı çempionluq münasibətilə təbrik edir...
- Əgər onlarla öz aramızdakı oyunda qələbə qazansaq və təxirə salınmış görüşdən də qalib ayrılsaq, xal fərqi 2-yə enəcək. Bu isə elə də çox böyük fərq olmayacaq.

- Futbolçuların bir neçə aydır maaş almaması bu mübarizəyə təsir göstərməyəcək?
- Heç bir halda. Aydın məsələdir ki, pul vacibdir. Çünki hamımızın ailəsi var. Amma hər bir futbolçu etiraf edər ki, meydana çıxanda pulu düşünmürsən.

- Amma "İnter" ötən mövsümdəki qədər istəkli oynamır...
- Sizinlə mübahisə etməyəcəyəm. Çünki bu, sizin fikrinizdir. Amma mən fikrinizlə razı deyiləm. Bu mövsüm də kifayət qədər keyfiyyətli oyunlar keçirmişik.

- Qarşıdakı "Neftçi" ilə oyundan nə gözləyirsiniz?
- Bu oyun çox şeyə aydınlıq gətirəcək. Qələbə bizim ən azı ikinci yeri tutacağımızı rəsmiləşdirəcək. Eyni zamanda çempionluq uğrunda mübarizəni davam etdirmiş olacağıq. Qələbə qazanmaq lazımdır.

- Maliyyə problemləri davam etsə, komandanı tərk etmək fikrinə düşməyiniz mümkündür?
- Müqaviləmin müddəti bir ay sonra başa çatır. Hələ necə olacağını bilmirəm. Hər şey ola bilər.

- "Simurq"un bir neçə futbolçusu bəyan edib ki, borcları ödənilməyəcəyi halda FİFA-ya şikayət edəcəklər. "İnter" də sizin maaşınızı ödəməsə, hansı addımı atacaqsınız?
- Artıq üç ildir "İnter"dəyəm. Bu komanda mənim üçün doğmalaşıb. "İnter"dən FİFA-ya şikayət etməyi heç ağlımdan da keçirmirəm. Hər şeyin yaxşı olacağına inanıram.