Samir Məsimov: Sumqayıt Qarabağ deyil, finalda hər şey fərqli olacaq

"Neftçi"nin yarımmüdafiəçisi Samir Məsimovun azerisport.az saytına müsahibəsi

- "Sumqayıt"la oyun barədə nə deyə bilərsiniz?
- "Sumqayıt" öz oyun üslubuna görə xoşagəlməz komandalardan hesab oluna bilər. Onlar döyüşkəndirlər və əvvəldən sonadək mübarizə aparırlar. Ağır oyun olacağını bilirdik. Elə də oldu. Biz qələbəyə köklənmişdik. Təbii ki, heç-heçə bizi qane etmədi. Kanales meydandan qovulmasaydı, hər şey bizim üçün daha yaxşı nəticələnə bilərdi.

- İkinci hissədə hücumlarınızın kəsərsiz alınması da azlıqda qalmağınızla bağlı idi?
- Biz risk etmək istəmirdik. Çünki üçüncü qolu buraxacağımızdan ehtiyatlanırdıq. Bu üzdən öz oyunumuzu göstərməyə və hesabı bərabərləşdirməyə çalışırdıq. Buna nail ola bildik. Heç-heçə də pis nəticə deyil. Əsas odur ki, uduzmadıq.

- "Neftçi"nin bu gün bəxtinin gətirdiyini demək olar?
- Bəxtimizin gətirdiyini deməzdim. Hətta azlıqda olmağımıza rəğmən, rəqibə güzəşt etmədik. Bizim bəxtimiz gətirmədi ki, azlıqda qaldıq. Qol vəziyyətlərimiz də var idi.

- Rəqib müdafiə xəttinizi çox asanlıqla keçirdi...
- Heyətdə xeyli gənc futbolçu var idi. Ola bilər ki, təcrübə çatışmır. Səhvlər var idi, amma onlarsız da mümkün deyil.

- Gözəl qol vurdunuz...
- Vobay ötürmə etdi, mənə isə ona toxunmaq qalırdı. Nəticədə, hədəfə düşə bildim.

- Bu mövsüm daha böyük hədəflər uğrunda mübarizə apara bilməməyiniz sizə necə təsir etdi?
- "Neftçi" həmişə çempionluğa oynayıb. İstər-istəməz, bu mövsüm çempionluqdan uzaq qalmağımız bizə təsir etdi. Amma biz Azərbaycan kubokunun finalına vəsiqə qazanmışıq. Həmin oyuna tam fərqli istəklə çıxacağıq. "Sumqayıt" "Qarabağ" deyil. Həmin oyunda tam fərqli futbol sərgiləyəcəyik.