Coşqun Diniyev: Atamla məsləhətləşib, qərar verəcəyəm
"İnter"in yarımmüdafiəçisi Coşqun Diniyevin azerisport.az saytına müsahibəsi
- "Qarabağ" 32-ci turda çempionluğunu rəsmiləşdirə bilər. "İnter" hələ də nəyəsə ümid edir?
- Biz mübarizəmizi sonadək davam etdirəcəyik. Ümid sonra ölür. Bizim üçün vacib olan öz oyunumuzu sərgiləyib, qələbə qazanmaqdır.
- "Simurq"la oyundan nə gözləyirsiniz?
- Bizi çətin rəqiblə qarşılaşma gözləyir. Onlar futbol oynamağı bacarırlar. Amma hər şeyə rəğmən, Zaqatalada qələbə qazanmağa hazırlaşırıq.
- "İnter" bu mövsümü böyük ehtimalla titulsuz başa vuracaq. Kubokun yarımfinalında "Neftçi"yə uduzdunuz. Bütün ümidlərinizin üzərindən Nikolas Kanalesin xətt çəkdiyini demək olar?
- Xeyr. Cavab oyununda bizim bəxtimiz gətirmədi. Baş hakim isə iki kobud səhvə yol verdi. Nəticədə də qapımıza qol vuruldu. Kanales də təbii ki, öz ustalığını nümayiş etdirdi.
- Qışda "Qarabağ"a keçəcəyinizə dair xəbərlər var idi. Bu transferi gözləməyə dəyər?
- Bu barədə bütün məlumatlar atamdadır.
- Hara keçəcəyinizə o qərar verəcək?
- O, həmişə danışıqlar aparır. Mövsümün sonunda da onunla məsləhətləşəcəyəm və qərar verəcəyəm.
- Vaxtilə sizi Şota Arveladze də komandasında görmək istəyirdi. Amma indi o, həmin komandada deyil...
- Yaşayarıq, görərik. Arveladze ilə yanaşı, klub rəhbərliyi də mənim oyunumu bəyənmişdi. Ona görə də hər şey mümkündür.
- Başqa klublardan dəvət yoxdur?
- Hələ yox.
