Mahmud Qurbanov: Milliyə düşmək istəyən futbolçu öz oyunu ilə buna layiq olduğunu isbatlamalıdır

Azərbaycan yığmasının məşqçisi Mahmud Qurbanovun azerisport.az saytına müsahibəsi

- Mövsümün başa çatmasına bir ay qalıb. Çempionluğun taleyinin həll olunması fikri ilə razısınız?
- Çətin ki, kimsə "Qarabağ"ı çempionluqdan məhrum edə bilsin. Amma digər mükafatçılar və avrokubok yerləri ilə bağlı eyni sözləri demək olmaz. Çünki orada xal fərqi çoxdur. Hər şey ola bilər.

- Bu tur "Qarabağ"ı 8 oyundur qələbə qazanan "Qəbələ" ilə oyun gözləyir. Sizcə, Ağdam klubu bu komandanı dayandırıb, çempionluğu təmin edə biləcək?
- Hər şey ola bilər. Oyun planında mənə elə gəlir ki, "Qarabağ" daha yaxşı təsir bağışlayır. Fikrimcə, Ağdam klubu rəqibini dayandıra bilər. Amma buna nail olmaq çətin görünür. Baxmayaraq ki, "Qarabağ"ı favorit görürəm.

- Bundan əvvəlki oyunda da "Qarabağ" favorit göstərildiyi oyunda "Qəbələ"yə uduzmuşdu...
- Elədir. Amma istənilən halda hər şeyə 90 dəqiqədən sonra aydınlıq gələcək.

- "Simurq"un maliyyə problemləri ilə üzləşməsi barədə nə deyə bilərsiniz?
- "Simurq"da xeyli legioner var. Onlar da burda pula görə çıxış edirlər. Amma bir az maliyyə problemi yaranan kimi, narazılıq yaradırlar. Bütün bunlar da oyunçulara, onların hazırlığına təsir edir. Lakin istənilən halda düşünürəm ki, hər bir futbolçu müqaviləyə əsasən bütün öhdəliklərini layiqincə yerinə yetirməlidir.

- Eyni problemlərin "İnter"də də yaranması istisna olunmur...
- Razıyam ki, bütün bunlar çempionatın da səviyyəsinə təsir edir. Özü də bu, klub səviyyəsində də yox, yığma səviyyəsində də təsir edə bilər. Çünki bizim əksər yığma üzvlərimiz məhz milli çempionatda çıxış edir.

- Elita klublarının sayını dəyişməyə ehtiyac var?
- Futbolçularımızın daha çox oyun keçirməsinə ehtiyac var. Bu, onların formada qalmasına kömək edir.

- Elitanı tərk edən "Araz Naxçıvan"ı hansı klubun əvəzləməsini istərdiniz?
- Fikrimcə, bu, birinci divizionda birinci yeri tutan komanda olacaq. Mən "Kəpəz"i elitada görmək istərdim. Amma təəssüf ki, bu komanda yaxşı günlərini keçirmir.

- Adətən elə olsa da, sonra birinci divizion klublarının lisenziya şərtlərinə əməl etmədiyi üçün çempionata buraxılmamasının şahidi oluruq.
- Bu, artıq klubların problemidir. Əgər onların bütün sənədləri qaydasında olsa, Premyer Liqada oynaya bilərlər.

- "Neftçi"nin milliyə futbolçusu çağırılmaması da son dövrlər çox müzakirə olunur...
- Buna baş məşqçi qərar verir, biz də onu dəstəkləyirik. Burada klubluq heç nə yoxdur. Milliyə oyunçuları əvvəlki xidmətlərinə görə yox, indiki formalarına görə dəvət edirik. Biz özümüz də istərdik ki, yığmada böyük rəqabət olsun. Hər şey futbolçuların özlərindən asılıdır. Kim yığmaya düşmək istəyirsə, öz üzərində daha çox çalışmalıdır, öz oyunu ilə buna layiq olduğunu sübut etməlidir.