Səməd Qurbanov: Kuboku Neftçi qazanacaq
"Neftçi"nin Müşahidə Şurasının üzvü Səməd Qurbanovun azerisport.az saytına müsahibəsi
- Artıq bir aydır "Neftçi"də çalışırsınız. İşlər necə gedir?
- Yaxşı. Hər şey tədricən qaydasına düşür. Hiss olunur ki, məşqçilər korpusu və futbolçularda məsuliyyət artıb. Çingiz Abdullayev klubun infrastrukturunu yaxşılaşdırmaq işi üzərində çalışır. İsmət Qayıbov adına Bakıxanov qəsəbə stadionunda gələcəkdə baza və meydançalar inşa olunacaq. Şərait digər klublardakından da yaxşı olmalıdır. "Neftçi" kimi klubun şəraiti başqa cür ola da bilməz.
- Son vaxtlar klubun strukturunda aparılan dəyişikliklər çoxlu söhbətlərə yol açır. Siz bu rezonansa necə baxırsınız?
- Siz mənə elə bir struktur göstərin ki, ora yeni rəhbərlik gələndən sonra dəyişiklik olmayıb. Bu, normal prosesdir. Biz kluba fayda verə biləcək insanları işə cəlb edirik. Bizim hədəfimiz klubu yeni səviyyəyə qaldırmaqdır. İstəyirik ki, gördüyümüz işlər digər klubları da bizim arxamızca getməyə məcbur etsin.
- Klubun futbolçulara borcu var. Maliyyə problemi nə vaxt həll olunacaq?
- Ötən gün borcların bir hissəsi ödənildi. Maliyyə baxımından problemimiz olmamalıdır. Komanda üzvlərinə təşəkkürümü bildirirəm ki, müvəqqəti çətinliklərə baxmayaraq, hər oyunda meydana çıxıb sonadək mübarizə apardılar. "Neftçi" heç kimə borclu qalmır. Biz pula görə klubun adını batıra bilmərik.
- Araz Abdullayevin "Qarabağ"a keçəcəyi barədə xəbərlər nə dərəcədə doğrudur?
- Araz klubumuzun yetirməsidir və o, komandada qalacaq. Mənə elə gəlir ki, bu futbolçu "Neftçi" üçün yaranıb. Çətin ki, o, doğma klubunu başqa komandaya dəyişsin. Bütövlükdə, hesab edirəm ki, belə futbolçunu komandadan buraxmaq olmaz.
- Kubokun finalında "Qarabağ"a qarşı keçirəcəyiniz oyundan nə gözləyirsiniz?
- Azərbaycan Kubokunu "Neftçi" qazanacaq (gülür). Bütün diqqətimiz məhz həmin oyuna yönəlib. Bu, komandanın əsas hədəfidir. Əlbəttə, Premyer Liqada üçüncü pilləni tutmağa da çalışmalıyıq. Bunu da unutmaq olmaz. Uşaqlar özləri də deyir ki, biz "Qəbələ"nin bürünc medalları əlimizdən almasına imkan verməyəcəyik.
