"Azərbaycanda məni eşitmək istəmirdilər, amma nəticə tələb edirdilər"

Futzal üzrə Azərbaycan yığmasının və "Araz"ın sabiq baş məşqçisi, hazırda Qazaxıstanın "Kayrat" klubunu çalışdıran braziliyalı mütəxəssis Joze Alesionun azerisport.az saytına müsahibəsi

- Sizi UEFA Kubokunu qazanmağınız münasibətilə təbrik edirik. Təəssüratlarınız necədir?
- Belə bir titula sahib çıxmaq nə qədər xoşdursa, bir o qədər də çətindir. Yarımfinalda Rusiya "Dina"sı ilə qarşılaşdıqsa, finalda son çempionla üz-üzə idik. Amma biz yaxşı hazırlaşmışdıq və avrokuboklar mövsümünü layiqli qələbə ilə başa vurduq. Bu, Qazaxıstan üçün böyük uğur idi.

- Yəni Azərbaycanı tərk etdiyinizə peşman deyilsiniz?
- Mən peşəkarların arasına düşmüşəm. Klub öz işini yüksək səviyyədə qurub və burada çalışmaq çox xoşdur.

- Bəs Azərbaycan klubları belə uğura imza atmaq üçün nə etməlidir?
- İşlər sistematik şəkildə aparılmalıdır. Elə olan halda uğur qazanmaq daha asan olur. Mən bunu dəfələrlə demişəm. Azərbaycanda isə bu baxımdan problemlər var idi.

- Sizdən sonra gələn mütəxəssisin nəticələri ilə maraqlanırsınız?
- Tino Peresə böyük hörmətim var. Bu üzdən də onun işini şərh etmək istəmirəm. Sadəcə, ona vaxt lazımdır və yaxşı şərait yaradılmalıdır. Gələn kimi uğur qazanmaq elə də asan deyil. O, yaxşı mütəxəssisdir.

- Nə vaxtsa yenidən Azərbaycana qayıtmağınız mümkündür?
- Azərbaycanı sevirəm. Bu ölkə mənim üçün doğmalaşmışdı. Amma səni heç kimin eşitmədiyi yerdə çalışmaq ağırdır. Mən dəyişikliklər etmək istəyirdim, amma mənim fikirlərim qəbul olunmurdu.

- Buna görə Azərbaycanı tərk etmək qərarına gəldiniz?
- Məndən nəticə tələb edirdilər, amma eşitmək istəmirdilər. Mən də açıq dedim ki, belə olan halda "Araz"ın və Azərbaycan yığmasının uğur qazanması çətin olacaq. Strukturu peşəkar səviyyədə qurmaq lazımdır, dəyişiklik etmək lazımdır.