Mübariz Zeynalov: Hədəf kuboku qazanmaqdır

"Neftçi"nin Müşahidə Şurasının üzvü Mübariz Zeynalovun azerisport.az saytına müsahibəsi

- Müşahidə Şurasının yaradılmasından bir ay ötür. Nə kimi işlər görülüb?
- Bir ay müəyyən nəticəyə gəlmək üçün çox azdır. Şübhəsiz ki, hər işin başlanğıcında çətinliklər olur. Amma buna baxmayaraq, biz müəyyən işlər görmüşük. İdman direktoru vəzifəsinə Vəli Qasımovu dəvət etmişik. Dmitri Kramarenkonu qapıçılarla iş üzrə məşqçi təyin etmişik. Bizim gəlişimizdən sonra start götürən başqa proseslər də var. Zamanla bizim işimizin faydasını görəcəksiniz.

- Şura üzvləri klubun bazasında otururlar, ya toplantıdan toplantıya bir araya gəlir?
- Bizim hələ bazada oturmağımızın mənası yoxdur. Lazım olan vaxtda, həftədə bir və ya iki dəfə toplanırıq.

- Siz və Səməd Qurbanov Müşahidə Şurasında yeganə futbol adamlarısınız. Məsləhətləriniz dinlənilir?
- Sırf futbol məsələləri ilə bağlı müzakirələrdə şübhəsiz ki, bizim də fikrimiz öyrənilir. Anlaşma baxımından heç bir problem yoxdur.

- Komandanın indiki vəziyyəti sizi qane edir?
- Bütövlükdə, müsbət qiymətləndirmək olar. Komanda Azərbaycan Kubokunun finalına çıxıb, mükafatlar uğrunda mübarizə aparır. Hazırda əsas hədəf kuboku qazanmaqdır. Klub olaraq bu oyuna ciddi hazırlaşırıq. Avropa Liqasına vəsiqəni demək olar ki, təmin etməyimiz də bizi çox sevindirir.

- Bəs komanda ölkə kubokunu qazana bilməsə, necə olacaq?
- Uğursuzluq halında hansı dəyişikliklərin olacağını nəzərdə tutursunuz? Bu barədə mövsüm başa çatdıqdan sonra danışmaq olar. İndiki məqamda hansısa dəyişiklik barədə danışmaq yersizdir.

- Komandanın oyunundan razısınız?
- Hər şeyin məni qane etdiyini deyə bilmərəm. Bunun da öz səbəbləri var. Məsələn, heyətdəki itkiləri qeyd etmək olar. Elə bir oyun yoxdur ki, "Neftçi"nin həmin matçda optimal heyətlə oynadığını deyəsən. Hər görüşdə hansısa futbolçu müxtəlif səbəblərdən oynaya bilmir. Ümid edirəm ki, "Qarabağ"la final matçına optimal heyətlə çıxa biləcəyik. Komandanın nəyə qadir olduğuna da həmin görüşdə aydınlıq gələcək. Ondan sonra hansısa nəticəyə gəlmək olar.

- Müşahidə Şurasına "Neftçi"nin əsl şöhrətini geri qaytarmaq üçün nə qədər vaxt lazımdır?
- Biz bu şöhrəti geri qaytaracağıq. Bu işlə bir nəfərin məşğul olması ayrı, bir neçə nəfərin məşğul olması ayrıdır. Şurada yer alan hər kəs böyük iş görür. Nəticə də yaxşı olmalıdır.